Nunarput sms-ernermut rekortiliivoq!

Nunarput rekortiliivoq mobilip sms-itaa atorlugu ukiortaami nassiussuisoqaqattaarnerani, tanngassimaaqaluni taama nalunaarpoq TeleGreenlandip pisortaa Anders Barslund.

Nunatsinni innuttaasut mobiliminnik toortaanissaminnut sukkatsikkaluttuinnarput, tassami ukiortaap ingerlanerani sms-inik nassiussuisut 175.000-iusimapput, siornamut tamanna sanilliukkaanni 10 procentimik qaffariarsimavoq, aatsaallu taamak sms-inik nassiussuisoqartigaaq.

Taama sms-ertorpassuaqarnera takussutaavoq nunatsinni inuppassuit mobilitaartuartuummata.

Mobilit GSM-it ukiut pingasut matuma siorna atugaalermatali mobilit atugaanerat qaffariartupiluulersimavoq, nunatsinnilu ullumikkut 45.000 – inik mobileqartoqarpoq.

Tele – p pisortaa Anders Barslund oqarpoq, mobilit tusassilertakkat nuannarineqaqisut, 2005-illu ingerlanerani taama ittunik pisisut nutaat 7000-iusimapput. Taassuma ilimagaa, mobilit tungaasigut qaffariartupiloorneq peqquteqartoq, nunaqarfinni aamma mobileqalernera.

- Mobilinik atuisartut kinguaariit nutaat takkuttuaannarput, inuusuttorpassuit mobileqarput, ilaqutaariillu iluanni arlariit mobileqartarput, Tele-p pisortaa Anders Barslund oqarpoq

Nunatsinni inuppassuit mobileqareermata mobilit tunisaajartupiloornerat unikaallassasoq Anders Barslundip ilimagaa.