Nunarput saviminissamik piiaaffissuaqalilerunarpoq
Quadra Miningip aatsitassarsiornissamini pilersaarutigaa Illoqqortoormiut avannaatungaanni saviminissamik piiaaviutigaluni, sisaliornermi aatsitassamik atorneqartartumik molybdænimik suliffissualiornissaq.
Pilersaarut 4 milliardi koruuninik naleqarpoq, aningaasat amerlaginarsinnaagaluarput, aatsitassarsiornermili ikiginartut, Berlingske Businessimi allaaserinnittoqarpoq.
Nunarsuarmi saviminissap akia qaffakkaluttuinnarpoq, taamaammat amerikamiut europamiullu aatsitassarsiorfii tamaviaarlutik nunarsuaq tamaat saviminissamik ujaasiffigaat, aamma nunarput.
Akuerineqassappat naatsorsuutigineqarsinnaavoq aatsitassarsiorneq 2012-imi upernaakkut aallartissasoq, tassami apeqqutaassammat Kalaallit Nunaanni Aatsitassat Ikummatissallu pillugit Siunnersuisoqatigiit saviminissamik piiaanissamik akuersissanersut.
Akuersissappata Illoqqortoormiut avannaani aqqusinniornerit umiarsualiviliornerillu aappaagu aallartissinnaassapput. Sanaartornermi 600-nik sulisoqartariaqassaaq, aatsitassarsiorfillu atulerpat sulisunik 300-nik pisariaqartitsisoqassaaq.
Canadamiut aatsitassarsioqatigiivisa ilimagisinnaavaat, aatsitassat molybdæni, aqerlussaq aamma zinki 40-50 milliardi koruuninik nalillit qallorsinnaassallugit. Nunaminertaq aatsitassarsiorfissatut piukkussaq taanna siornatigut uuliasiorfiunikuuvoq.
Quadra Miningip aatsitassarsiorneq aallartippat naatsorsuutigisinnaavaa ukiumut 2,5 milliardi koruunit ukiuni tullerni 15-20-ni kaaviaartissinnaassallugit.
Illoqqortoormiut avannaatungaani molybdæneqarnera 1950-ikkunili paasineqarpoq, taamanili akia appasippallaaqimmat piiaanissaq akilersinnaasorineqarsimanngilaq. Piffissap sivikitsup ingerlanerani molybdænip akia sisamariaammik qaffariarsimavoq.
Aatsitassarsioqatigiiffiup Quadra Miningip siulersuisuisa januaarimi aalajangissavaat, Tunup Avannaani aatsitassarsiorfiliussanerlutik.