Nunarput Savalimmiullu imminnut aalisagartassiissuteqarput
Nunarput Savalimmiullu nalinginnaasumiit ukiup affaanik kingusinaartumik aalisarneq pillugu isumaqatigiissummik ukioq mannamut atuuttussamik isumaqatigiissusiorput - erseqqissaatigineqarporli isumaqatigiinniarnermi illuatungeriit isumaqatigiinngissimammata pisarnermiit ukiup affaanik kingusinaartoqarsimasoq.
Illuatungeriit nutaamik isumaqatigiissusiorniarlutik siullerpaamik ukioq naapeqqaarput. Taakku isumaqatigiissutiginiartussaavaat nunatsinni Savalimmiunilu qanoq aalisagartassiitigisoqassanersoq. Isumaqatigiinniarnermili Savalimmiut eqqaani suluppaagartassiinissaq kisiat killiffigineqarpoq.
Taamaattumillu illuatungeriit maanna isumaqatigiissutigiinnarpaat suluppaakkat agguaannissaat isumaqatigiissummi ilanngunneqassanngitsut.
Tamatumunngalu taarsiullugu Islandi, nunarput Savalimmiullu ukiup ilaani kingusinnerusukkut suluppaakkat agguaannissaat pillugu isumaqatigiissuteqaannassasut.
Isumaqatigiissummilu maanna atuutilersumi isumaqatigiissutaavoq, Savalimmiormiut aalisariutaat nunatsinni ukioq manna qaleralinnik 350 tonsinik aalisarsinnaassasut. Taakku saniatigut 225 tonsit misiliilluni aalisagartassiissutaassallutik.
Savalimmiut radio-ata tusarliuppaa illuatungeriit qaammatialuit qaangiuppata naapeqqissasut nutaamillu aappaagumut atuuttussamik isumaqatigiissutiliussallutik.
