Nunarput qorsooqqissoq pillugu atuakkiaq saqqummerpoq
Namminersornerullutik Oqartussani atorfilittaasimasoq kingusinnerusukkullu Tasiilami aamma Qaqortumi katersugaasiviup pisortarisimasaa Ole G. Jensen atuakkamik saqqummersitsisuuvoq.
Taassumalu qularnanngitsumik Nunatta naggorissortaa qorsuusortaalu nuannarilluinnarunarpai.
Atuagaq 144-nik qupperneqartoq Kujataani assilisanik kusartorsuarnik ulikkaarpoq, Nunatta kujataata mamartuutaanik assersuutissarpassuaqarluni, soorlu savaaqqanik, aalisakkanik naatitanullu naatsitsivinnik naggorissunik.
Illut oqaluffiillu Kujataani illoqarfinnut nunaqarfinnullu oqaluttuarisaanermut pingaarutillit kusanartut aamma ilaapput.
AAMMA ATUARUK Kalaallit kulturiat oqaatsini arfineq-marlunni
Taamaalilluni pinngortitamik kusanartumik nuannarisallit - imaluunniit kujataamiut - asserpassuit nuannaarutigisinnaavaat.
Aamma matumani pineqarlutik Kalaallit Nunaata sinnerani amigaataasut - Kujataani pigineqartut - tassa orpiit!
Portusoorsuunngikkaluarput, taamaattorli tamaaniillutik, tassa taakku orpiit - sumiiffik ataaseq orpippassuaqarfeeqqamik allaat taaneqarsinnaalluni!
Assit atuakkamiittut qallunaatut tuluttullu oqaasertaqarput.
