Nunarput qatserisartunik 27-nik ilinniarsimasunik pisuunnguallappoq
Nunatsinni qatserisartunngorniarfik Nuummiittoq Qaasuitsup Kommunea aamma Kommuneqarfik Sermersooq suleqatigalugit Aasianni Tasiilamilu piginnaanngorsaanikkut novembarimi decembarimilu pikkorissartitsivoq.
Allattoq Karsten Sommer
decembarip 29-at 2017 08:32
Naak assigiinngitsunik unammilligassaqaraluartoq, qatserisartunngorniartut ilinniakkaminnik pitsaalluinnartunik angusaqarlutik naammassinnipput, Nunatsinni qatserisartunngorniarfimmeersoq, Jakob Petersen oqarpoq.
Qatserisartut sulinermi misilittagaqareersuupput, holdillu marluk atuagarsornermik - teorimik misilitsikkamik angusarissaarluarput, Jakob Petersen oqarpoq.
Aasianni peqataasut siornatigulli pikkorissaasarnerni misilittagaqareerput, pikkorissartunilu aqqanillit tamarmik angusillutik.
Tasiilami siullerpaamik pikkorissaasoqarpoq, peqataasullu tamarmik tassa 16-t angusillutik.
Taamaalillutik qatserisartunngorlaat ukiormanna 27-t naammassipput.
