Nunarput portunerulissaaq

Sermersuup aakkiartornerani, taamaalillunilu saaliartuinnarnerani, qaarsuiit qaffakkiartorput. Naatsumik oqaatigalugu: Kalaallit Nunaat portusiartorpoq.
Allattoq Carla Davidsen
juulip 10-at 2012 11:52

DTU-mit kisitsisini nutaani maanna eqqoriarneqarsinnaavoq, sermersuaq taama aakkiartupiluuginnassappat Kalaallit Nunaat ukiut hunnorujut qaangiuppata meterinik pingasunik portunerulersimassasoq.

Qaarsuiit portusiartortut qangali ilisimaneqarpoq, ilisimatuulli uuttortaaneq nutaaq matumuuna atorpaat:

Sermersuup sinaani uuttortaatinik GPS-ilersorluni qaarsuiit nikikkiartornerat uuttortarneqarpoq. GPS-it 60-it 2007-ip 2009-llu akornanni ikkussorneqartut takutippat, sumiiffiit ilaanni qaarsuiit centimeterinik pingasunik ukiumut qaffattartut, taamaalillutik meterinik pingasunik ukiut hunnorujut qaangiuppata portunerulersimassallutik.

Kujataani malunnaarnerpaavoq, taamaattorli Qaanaami eqqaanilu nuna 1,5 centimeterinik ukiumut aamma portusisarpoq.

Nuna akulikinnerusumik sajuttalissaaq. Imaanili aamma allanngortoqassaaq. Tassa immap assingi nutartertariaqassapput.

Qeqertat nutaat puttussuutissapput, nunallu  portusiartornera umiarsualiviliortiternissanut umiarsuillu aqqutaasa allanngortiternissaannik kinguneqassalluni. Sivisuumik ilisimatusarsimasoq, Shfaqat Abbas Khan, DTU Space-imeersoq, oqarpoq.

Sermeq 230 milliardit tonsi Kalaallit Nunaata ukiumut annaasarpaa. Ilisimatusarnermit inernerit atuagassiami Proceedings of the National Academy of Sciences of the United States of Americami, PNAS-imik naalisarneqartumi, ullumi saqqummiunneqarput.