Nunarput politikkikkut ullumi oqallissaavissorpoq

Taamaattumillu Danmarkimi naalakkersuisut akuliuttariaqarnerannik Enhedslistep piumasaqaataa pisuusaarneruvoq.

- Tamanna tunngavigalugu Enhedslistep nunasiaatilittut nutaatut, apeqummi matumani Kalaallit Nunaat qulaatiinnarlugu aalajangiiniarnera upperinerluunniit ajornangajappoq, Mogens Jensen tusagassiuutinut nalunaarummini allappoq.

Partii naalakkersuisunut tunuliaqutaasoq Enhedslisten tamatuma akerlianik isumaqarpoq, taakkumi isumaqarput Danmarkimi naalakkersuisut kalaallit suliniutinut angisuunut inatsisiliaat iliuuseqarfigianianngikkunikku, oqaaserisartakkatik uniorlugit iliuuseqaraluttualersut.

- Marloqiusamik pissuseqarneq iluaqutaanavianngilaq. Danmarkimi akissarsiatigut sulinermilu atukkatigut apparsaaneq akiorniaatigalugu Kalaallit Nunaanni taama pisoqarnera akuersaaginnarsinnaanngilarput, Enhedslistenikkut Kalaallit Nunaannut tunngasunik oqaaseqartartuat Finn Sørensen aviisimut Politikenimut oqarpoq.

Finn Sørensenip tikkuarpaa, Kalaallit Nunaata nunanit allanit nunasiniartunut inatsisiliorsinnaaneq suli tigusimanngimmagu, taamaattumillu Danmarkip akissarsiatigut sulinermilu atukkatigut apparsaaneq akerliuffigisinnaagaa allanngortillugulu.

Kalaallit namminersortutut inissisimanerat Enhedslistenip assigiinngitsorpassuartigut illersormagu Mogens Jensenip Enhedslistenimut eqqaamaqquaa.

- Kisianni taamaallaat Enhedslistenip eqqortutut isigisai naapertorlugit kalaallit namminersorsinnaapput. Tamanna pisuusaarneruvoq, Mogens Jensen allappoq.

Kalaallit inatsisiliaat atuutilersinneqassappat, Danmarkimi nunasiniartunut inatsit allanngortinneqaqqaartariaqarpoq.