Assi: DR Ramasjang / Toolbox Film

Nunarput pillugu meeqqanut aallakaatitassiaq nangeqattaartoq nersornaasigassatut innersuunneqartoq

Danskit meerartaat nunatsinni ileqqutoqqat pillugit ilikkagaqarnissaat ilitsersuisup neriuutigaa.

Danskit/kalaallit meeqqanut nangeqattaartuliaat Danmarkimi filmilianik tv-kkullu aallakaatitassanik nersornaasiisarnermik anginerpaamik nersorsaanerseqarnissamut innersuutigineqarpoq.

Isiginnaagassiami arfineq-pingasunik ukiullip, Theodorip kammaginerpaasani Kalaallit Nunaannut tikeraarpaa.

Meeqqanut aallakaatitassiaq nangeqattaatoq, ’Min Bedste Vens Historier’, arfineq-pingasunik immikkoortoqarluni Nuummi nangittaqattaartuliaasoq meeqqat marluk nunatsinni misigisassarsiarnerannut tunngavoq. Meeqqat ilaatigut aavariarput, aliortukkanit qimaapput illoqarfimmiittunullu tamanut kaffisoriartoqqusillutik.

Nangeqattaartuliaq Tone Mygind Rostbøllimiit allagaallunilu ilitsersuineqarpoq. Taassumap ernera arfineq-pingasunik ukiulik, Theodor, pingaarnertut inuttaavoq.

Isiginnaagassiortup danskit meerartai nunatsinni pinngortitami kiffaanngissuseqartumik pinngortoqarsinnaanerannik oqaluttuarinissaa pingaartuutippaa.

- Meeqqanut pinngortitami pinnguarlutik takorluuisinnaanerminnik atuinissaat pinngortitamiinnissaannillu kaammattuisumik oqaluttualiornissaq takorluugarisimavara, Tone oqarpoq.

Tone affarmik norgemiuuvoq, taamaammat silami pinngortitami pinnguartarneq nalunngilluinnarpaa. Taamaammat meeqqat tv-kkut nangeqattaartuliornikkut silami pinnguarnerusoqarnissaanik kajumissaarerusuppoq.

- Atortorissaarutit igalaasartaasa saanni piffissarujussuaq atorneqartarmat aneernissaq pingaarluinnartuutippara.

Wilhelmip Kalaallit Nunaa

Tonep ernerata Theodorip kammalaatiginerpaasaa, Wilhelm, nunatsinnut attuumassuteqarpoq. Taannalu piffissami sivikitsumi Nuummi najugaqarnikuuvoq, Wilhelmimmi angutaa Ilannguaq David Lumholdt, kalaaleq danskinit kingoqqisuusoq erinarsortartuullunilu nipilersortartuuvoq.

Wilhelmillu nunatsinni misigisaminik oqaluttuartarneri pillugit Theodore anaanaalu Wilhelmip Kalaallit Nunaannukarusulerput.

Nangeqattaartuliami Theodore aamma Wilhelm ilaatigut aavariarput. Tonellu aavariartarnerup Danmarkimi aamma ileqquunissaa kissaatigigaluarpaa.

- Meeqqat tamarmik misigissagaat kissaatigigaluarpara, tassami ilissi Kalaallit Nunaanni ileqqorsi tupinnartuuvoq. Qanoq inuuneq nunarsuarmilu pinngortitaanerup qanoq innera ilikkagaqarfiulluartarpoq. Uumasumik pisaqarneq immikkuullarilluinnartumik misiginarpoq.

Danskit meerartaat sunniiffigissallugit neriuuteqartoq

Nangeqattaartuliaq Danmarkimi tv-kkut takuneqarnerpaat qulit akornanni innersuunneqarpoq, danskillu meeqqat nunarput pillugu annertuumik ilikkagaqarsimanissaat Tonep neriutigaa.

- Aappi, taanna neriuutigaara. Kalaallit Nunaannut neriuppunga aallalerumalissasut, qanorlu pinngortitamut aneerusuttarneq unganartigisoq misigissagaat. Tassa aneerneq imminullu malugisarneq, sussa kimillalaaraluaraanni.

- Silarsuaq aneerfigalugu misigisaqarfigalugu ajunnginnerpaavoq. Kalaallit Nunaannilu ileqqut Danmarkimiittunit pitsaanerupput. Tv-kkut nangeqattaartartuliap takutitsisinnaanissaa sunniisinnaanissaalu neriuutigaara, Tona oqarpoq.

Taasineq marlunngorpat matussasoq

Danmarks Film Akademip isiginnaartartut kina Go'Seerimik tassa danskit tv-kkut isiginnaagassiaanni takuneqarnerpaat qulit akornannit nersornaaserneqassanersoq ukioq manna toqqarsinnaavaat.

Januaarip 26-anni nersornaasiisoqassaaq, toqqaanissarlu marlunngorpat kalaallit nalunaaqutaat naapertorlugu ullaakkut arfineq-pingasunut unissaaq.

TV2-p nittartagaatigut taaseqataasoqarsinnaavoq.

Meeqqanut nangeqattaartartuliaq DR-ip nittartagaatigut isiginnaarneqarsinnaavoq.

Nersornaat Robert danskit filmilianut nersornaasiissutigisarpaat, taanna Danmarks Film Akademimit tunniunneqartarpoq. Filmakademiilu naapertorlugu taanna amerikamiut Oscarimik nersornaasiisarnerannut assersuutigineqarsinnaavoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat