Nunarput pillugu ilisimasakippallaarput

novembarip 20-at 2006 11:10

- Amerikamiut nunarput pillugu ilisimasakippallaarput. Nunatsinni Takornariaqarnermi Inuussutissarsiornermilu Siunnersuisoqatigiit amerikamiut nunatsinnut tikeraartarnissaat kissaatigaat, tamannalu anguniarlugu ussassaarutimininnguit maanngamut atortakkavut naammanngillat siunnerfeqartumilli paasisitsiniaanissaq pisariaqarluni, Københavnimi niuernermik ilinniarfimmi aningaasarsiornermik immikkut ilisimasalittut naammasseqqammisoq Stine Dudda taama oqarpoq.

Nunatsinni takornarnianik angallassisartut misigisartagaat kisitsisinngorlugit allaaserineqarneri Stine Duddap soraarummeerutigalugu immikkut allaaserisaani imatut qulequtserneqarsimasumi ”Kalaallit Nunaata USA-mi isigineqarnera” –ni atuarneqarsinnaapput. Amerikamiut utoqqasaat, pissaqarluartut ilinniarluarsimasullu nunatsinnut takornarniartarnissaat anguniarneqarsinnaalluarpoq, Stine Duddammiuna Nunatsinni Takornariaqarnermi Inuussutissarsiornermilu Siunnersuisoqatigiit qanoq siunnersorusukkai?

- Amerikami nutaarsiassaqartitsivinni tusagassiortut siullertut soqutiginnilersinneqarnissaat pingaaruteqarpoq. Taamatut soqutiginnilersitsinnissami eqqortumik paasissutissiinissaq aamma pingaaruteqarluinnarpoq. Kalaallit Nunaanni inuiaqatigiit kulturillu erseqqissumik saqqummiunneqartariaqarput amerikamiummi Kalaallit Nunaat sermiinnartut aputaannartullu takorloortarpammassuk. Nutaarsiassaqartitsiviit amerikami innuttaasut tutsiuigisaat aqqutigalugit oqallisaarisoqarsinnaavoq. Kalaallit Nunaanni inuiaqatigiit inuiaqatigiittulli allatut inuusut paasisitsiniutigissallugit pingaaruteqarpoq, ingammik immikkut kultureqarnerannik ilisimatitsissalluni pingaaruteqarluinnarpoq.

Columbusi qaqortunit amilinnit siullersaalluni amerikamukarsimasutut maanna amerikamiunit amerlanernit isiginiarneqartarpoq. Tamanna nutaarsiassaqartitsivitsigut ilumuunnginnerarlugu oqallissaarisoqarsinnaavoq oqarluni: vikingi siullersaalluni, Columbusi sioqqullugu, amerikamukarsimasoq. Amerikami innuttaasut tamanna eqqartoreerunikku Kalaallit Nunaannik soqutiginnilernissaat ilimagilluinnarpara. Tamatumalu kingorna tikeraarnissartik soqutigilerlugu takornarniarnissaat aamma ilimagivara, Stine Dudda oqarpoq.

Amerikamiut nunatsinnik ilisimasaqarnerat siullerpaamik pisortatigoortumik Stine Duddap soraarummeerutigalugu saqqummiineratigut saqqummiunneqarpoq. Stine Dudda saqqummiigami 13-inimik angusaqarpoq.