Nunarput pillugu ilisimasakippallaarnerarpai
Danmarkimi innuttaasut Kalaallit Nunaat pillugu ilisimasakippallaarput, taama isumaqarpoq Vejlemi kalaallit peqatigiiffianni ’’Qarsoq’’-mi siulittaasoq Daniel Skifte:
- Kalaallit Nunaat pillugu Danmarkimi ilisimasakittoqarpallaarpoq, aamma isertuunneqartariaqanngilaq aallakaatitassiaq "Flugten fra Grønland" qularnanngitsumik tamatumunnga annertuumik sunneeqataammat, taamaattumik pilersaarutit naapertorlugit Kalaallit Nunaat pillugu saqqummiussaqarsinnaagatta, Daniel Skifte oqarpoq, nangipporlu:
- Nunatsinni ernguttoqaannanngilaq, socialikkullu pissutsit naammaginngitsut qitiussanngillat. Naalakkersuisut naalakkersuisuusarsimasullu assigiinngitsunik suliniuteqartartut, aamma Folketingimi ilaasortat Danmarkimi angalaarlutik paasisitsiniaasarnissaat pingaartorujussuuvoq, Daniel Skifte naggasiilluni oqarpoq.
Peqatigiiffik Qarsoq ungdomskolemi Domus-imi Vejlimiittumi kalaallit kulturiat pillugu decembarip 15-ianni 16-iannilu saqqummersitsissaaq.