Filmiliortartup Anne Regitze Wivel-ip nunarput pillugu filmiliaa, ”Menneskenes Land” sapaatip-akunnerata naanerani Katuami takutinneqareersorlu oqallitsitinermi isiginnaartartunit isornartorsiorneqangaatsiarpoq. Isornartorsiuisunut ilaavoq isiginnartitsisartoq ilitsersuisartorlu, filmiliornermillu ilinniagaqarsimasoq, Makka Kleist.
-Assut nikallungallunga filmereerlunga anivunga, Makka Kleist oqaluttuarpoq, oqariartuutaalu ima paasillugu:
- Qiviariarsigik politikerisi namminersulivinniarlutik oqalupput, naak ajornartorsiuterpassuit atugarigisisi, Makka Kleist isummersorpoq.
Makka Kleist aamma isumaqarpoq filmimi ajornartorsiutaannaviit saqqummiunneqarneri avaanngunartutut misigisimallugu, aammalu oqarluni avataani najugaqartuusunut pingitsoorani kalaallit namminersulivissinnaanginnerannut ersersitsiniartutullusooq paasillugu.
- Misigisimavunga ajortuinnaanaasiit takutinneqartut, taamattumik qallunaat allamiullu allat pinngitsooratik takugunikku namminersulivissinnaangitsutut nalilissavaatigut, Makka Kleist filmip ersersinniagaa illuinnaasiornerarlugu aamma naliliisoq oqarpoq.