Nunarput pillugu atuagaq nutaaq

Nunat killiit Kalaallit Nunaannik issittumillu isiginneriaasiata, ukiorpassuarni ataasiinnaajuarsimasup maanna allanngortinneqarnissaa periarfissaqalerpoq. Taama isumaqarpoq atuakkamik saqqummersitseqqammersoq Lill Rastad Bjørst. Silap allanngoriartornera pissutigalugu Kalaallit Nunaata Issittullu nunarsuarmiunit isiginiarneqarnerujussuat atorluarneqarsinnaasoq, atuakkiortoq isumaqarpoq.Rosa Thorsen paasissutissiissaaq:

Kalaallit Nunaat pillugu atuagaq oqallissaarut nutaaq qallunaatut En Ny Verdenimik taasaq Lill Rastad Bjørstimit allanneqartoq saqqummersitsivimmillu Biosimit naqinneqartoq Danmarkimi pisiassaaleqqammerpoq.

- Nutaamik inissisimasoqalerpoq. Kalaallit issittormiullu allat inooriaatsiminnik nutaaliaasumik maanna nunarsuup sinneranut takutitsinissaminnik periarfissinneqarput, Lill Rastad Bjørst taama isumaqarpoq.

Kalaallit Nunaata Issittullu sinnerata oqaluttuassartaa nunanit killernit ukiorpassuarni oqaluttuarineqartarpoq. Maanna issittup sammineqarnerujussua issittumi inooriaatsimik nutaaliaasumik ilisarititsinissamik periarfissiivoq.

- Ingammik Kalaallit Nunaat namminiilivippat nunat tamalaat akornanni inissisimaffimmik nutaamik nassaarnissaq pingaaruteqarpoq, taama oqarpoq atuakkiornngaaq Lill Rastad Bjørst.

Kalaallit Nunaannimi inooriaaseq nunarsuup sinneranisut ippoq, atuariartortoqartarpoq, arsaakkiartortoqartarluni suliartortoqartarlunilu.

Nunarsuulli sinnerani Kalaallit nunaat, issittullu sinnera pillugu assiliaq aallaakkajuttarpoq. Itsaq inooriaaseq suli inooriaaserineqartutut saqqummiunneqartarmat, Lill Rastad Bjørst taama oqarpoq.

Atuagaq maajip aallartilaarnerani nunatsinni pisiarineqarsinnaalissaaq.