Nunarput pillugu ataatsimiititaliaq pissarsilluarpoq
Ataatsimiititaliami ilaasortat nunatsinni angalaarnerat aallarnerlugu Tunumukaqqaarput, ilaatigullu Kulusuk, Tasiilaq Kuummiullu tikeraarneqarsimallutik. Sumiiffinnilu taakkunani ulluinnarni atugassarititaasut takusatik Folketingimi ilaasortat quarsaarutigeqalugillu tupigusutsaatigisimavaat.
- Kulusumut tikeraarnerput misigissutsitsinnik aalassassutaaqaaq. Tamaanimi innuttaasut atugarlioqalutik inuupput. Nunaqarfiulli atuarfittaani siunissamut isumallualersitsitsineq takullugu nuannersuuvoq. Aamma Kuummiuniikkatta uagut politikeriusugut eqiiallatsinneqartutut misigisimavugut. Nunaqarfiummi aalisakkerivia atortorissaaqaluni uninngaannarpoq, aalisariutit kingoraartissanik amigaateqarlutik uninngaannarmata.
- Aalisartummi sumiluunniit aningaasanik atorniarfissaqanngimmata angallatiminnik iluarsaassinissaminnut akissaqanngillat. Tamatumami kingunerisaanik nunaqarfiup annersaa ikiorsiissutaannarnik napaniuteqartariaqalersimalluni. Pissutsillumi tamakku iluarinnginnakkit Nuummut tikinniariarluta Kuupik V. Kleist-imut qaqileraluarpakka, qanoriliuuseqartoqarsimanersorli ullut manna tikillugu ilisimanngilara, Flemming Damgaard Larsen, partii Venstre sinnerlugu Folketingimi Kalaallit Nunaat pillugu ataatsimiititaliami ukiorpassuarni ilaasortaasimasoq tikeraarnini pillugu taama oqaluttuarpoq.
Ataatsimiititaliamili siulittaasup tullia, Doris Jakobsen angalanerup imarisai iluarinnginnerarpai. Namminersorlutimmi Oqartussat akisussaaffigilereersimasai amerlavallaat takornariarneqarput, taakkulu qallunaat politikeriisa susassariunnaareeraat unnerpai.
- Kommunefogedit, parnaarussiviillu takornariarneqarnissai ujartoraluarakkit piffissaqarfigineqanngillat. Ilami qallunaat politikeriisa kommunefogedinut parnaarussivinnilu sulisunut atugassarititaasut takusimasuugunikkit iluaqutaanerusimassangaluarpoq. Taakkuli pinnagit oqaluffiit, atuarfiit suliffeqarfiillu ataatsimiititaliamut attuumassuteqanngilluinnartut takornariarneqartarput. Tamakkuli eqqaassanngikkaanni takornariarneq iluatsilluartutut nalilertariaqarsoraara, sualummik politiinut, pineqaatissinneqarsimasullu inissiisarfiinut tunngatillugit, Doris Jakobsen oqarpoq.
Taamaammat qallunaat inatsisinik atortitsinermut ministeriata Morten Bødskov-ip ataatsimiititaliami ilaasortanit attaveqarfigineqarnissaa qularutissaanngilaq. Nunatsinnimi pineqaatissinneqarsimasut inissiisarfiini pissutsit ilungersunarluinnartut, politiillu Nunatsinni sullissilluarnissaannut akissakilliortunut atugassarititaasut ataatsimiititaliamimi ilaasortat takoreerpaat.
- Tasiilamimi Politiit Tunumi nunarujussuaq akisussaaffigaat. Taamaammat sulisut amerlanerit atorfinitsinneqartuuppata nunarujussuarmi sullissinermut iluaqutaassagaluaqaat. Aamma Nuummi pineqaatissinneqarsimasunut inissiisarfik pisariaqartitseqaaq. Tassanimi sulisunut inissinneqarsimasullu atugassarititaasut Danmarkimi politikerit akisussaaffigisaat isiginngitsuusaaginnarneqarsinnaanngilaq. Tassanimi atugassarititaasut tujorminarluinnarput, asulu aningaasarpassuunngikkaluit atorlugit aaqqiisoqarsinnaalluaraluarluni. Atugassartititaasulli uagut ajoraluartumik sumiginnartoorsimavagut, tamannalu iluarsiivigisariaqarparput, Flemming Damgaard Larsen oqarpoq.
