Nunarput Parisimi

Ataatsimeersuarnermut "The Cold"-imut atatillugu saqqummersitsineq "Kalaallit Nunaat ukiut 100-t matuma siorna" Parisip eqqaani Saint-Quentin-en-Yveslinesimi Versaillesip ilisimatusarfiani decembarip 12-iani ammarneqarpoq. Versaillesip ilisimatusarfiata issittumut immikkoortortaqarfia Montreaulimi Quebecip ilisimatusarfia suleqatigalugu ataatsimeersuartsinermik saqqummersitsinermillu aaqqissuisuuvoq.
Allattoq Peter Troelsen, Simon Uldum
decembarip 16-at 2013 07:52

Ilisimatusarfik Nunatsinneersunik issittumi teknologimik ilinniartoqarpoq, ilinniartitsisullu ilaat tassaavoq Jean-Michel Huctin, Nunatsinni ilisarisimaneqartoq, ukiuni arlalinni Uummannami najugaqarsimasoq aammalu filmimik INUK-mik pilersitseqataasoq.

Saqqummersitsinerup ammarneqarnera ornigallarluarneqarpoq, ataatsimeersuarnermi peqataasut ilarpassui saqqummersitsinermut alakkaammata, Nunatsinnilu assilisat assaannarmik qalipaasersukkat ukiunik 100-nik pisoqaassuseqartut alutorilluinnarpaat. Dronning Margrethep Prins Henrikillu Aningaasaateqarfiata franskit oqaasiinut nutserinermut aningaasaliineratigut Frankrigimi saqqummersitsinissaq iluatsinneqarsimavoq.

Kalaallit ilinniartut Ivalu Stender, Louise Grønvold aamma Ludvig Hammeken ataatsimeersuarnermi aamma saqqummiussaqarput, taakkulu kinguaariit kalaallit inuusuttut isumalluarnartullu paasisimasaqarluarnerannik takutilluarput.

Ilisimatusarfimmi saqqummersitsineq 2014-imi januaarip aqqarngata tungaanut ingerlanneqassaaq. Parisimukassagaanni uunga alakkarterneqarsinnaavoq: Boulevard Vauban 45, Guyancourt, ulluinnaat tamaasa ammavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq