Nunarput Panamerikamiut pissartanngorniunnissaannut annguppoq
Anngunniuulluni unammisaqattaarnermi Mexicomi sapaatit-akunneranni uani pisumi ippassaq aappassaanik ajugaasoqarneratigut annguttoqarpoq.
Nunatta Cuba ippassaani ajugaaffigaa, assammillu arsartartortatta Puerto Rico 39-29-mik ippassaq ajugaaffigaat.
Nunatsinni Assammik Arsartartut Kattuffiat malillugu assammik arsartartuvut angutit ippassaq aallartinnerlussimapput minutsillu siulliit 20-t kinguaqqasimallutik. Unikkallarnissarli sioqqutilaarlugu 18-16-mik siuaqqalerput.
Unamminerup immikkoortuata aappaani timersortarfissuup innaallagiaaruttoornera pissutigalugu unammineq minutsinik 15-inik unitsikkallarneqarpoq, tamannali kalaallit assammik arsartartuisa nikalluallaatiginagu siuaqqanertik ajuunnernik qulinik ilavaat 39-29-millu ajugaallutik.
- Cubamut tamaviaanartumik unammereerlutik unammisartut arlallit qasoqqasimapput, qaqiteqqinniarnissaallu imaannaasimanngilaq. Unamminerulli immikkoortuata aappaata naalernerani ilutsippoq unammisartuvullu tamakkerlugit ullumi unammisippagut, nunanut allanut unammisartut sungiusaasuat Lars Møller taama oqarpoq.
Unamminermi ajuunnerpaaq tassaavoq Danny Brandt, aqqaneq-marloriarluni ajuuttoq, tulleraalu Miilu Rosing arfineq-pingasunik Andreas Lorentzenilu arfinilinnik.
Mexicomut ullumi unammisoqassaaq, kalaallillu tassani ajugaassappata anngunniuulluni unammisaqattaarneri normu 1-inngussapput.
Qanorluunniit pisoqassagaluarpat Nunarput marloriarluni ajugaareernermigut Uruguayimi juunip naalernerani Panamerikamiut Pissartanngorniunnissaannut anngutereerpoq.
Tassanilu assammik arsarluni nunarsuarmi pissartanngorniunnissamut Qatarimi 2015-imi pisussamut peqataasussat pingasut nassaarineqartussaassapput.
