Nunarput nungukkiartuutaangitsumik qipoqqarniartalerusuppoq

Nunattta kitaata imartaani qipoqqaat pillugit misissuisoqassasoq Atlantikup avannaani miluumasut imarmiut pillugit suleqatigiiffiup Nammco-p Tromsømi ataatsimiinerani nunatsinniit piumasarineqarpoq.

Kitaata imartaani qipoqqaat amerliartuinnarsorineqarput, arferillu taakua ilaat bunkarnini saattuarniutiniluunniit ukiumut pingasut missaat pisarineqartoortartut oqaatigineqarpoq.

Assersuutigalugu ukiumut tallimat qulit sinnerlugilluunniit pisaqartoqartalissagaluarpat, tamanna qipoqqaqassutsimut qanoq sunniuteqassanersoq paasigusukkitsik, piniarnermut pisortaqarfimmi pisortaq Amalie Jessen oqarpoq.

Aammalu nungukkiartuutaangitsumik piniartoqassappat ukiumut qassit pisassiissutgineqartariaqassanersut ilanngullugu misissuiffigeqquneqarluni.

Biologit naatsorsussavaat misissuinissaq qanoq sivisutigissanersoq, qanoq akeqassanersoq ilaallu ilanngullugit.

Siorna 2004-mi tikaagulliit tikaagulliusaat qipoqqaallu imartatsinniitut pillugit misissuisoqarpoq. Misissuinerullu inernera junip qaammataani saqqummunneqassasoq Amalie Jessen oqarpoq.

Ukiut 15-it matuma siorna kitaata imartaani qipoqqaat kisinneqarmata 400-t missaanik amerlatigisutut naatsorsorneqarput.