Nunarput Nunavumiit puisit amiinik pisisassaaq

Puisit amiinik Canadamiit piseqqusiunnaarnermut atatillugu paatsiveerusimaarneq ippassaq annertuseriaannarpoq, Naalakkersuisut Nunavumiit amernik pisisinnaaneq aqqutissiuunnialermassuk.

Nunavumi naggueqatitta Naalakkersuisui puisit amiinik atisaqarlutik tikeraarnermikkut nunatta Naalakkersuisui apeqqummi aalajangernerigaluat mumisippaat:

Siullermik puisit amiinik Canadamiit pisisinnaaneq ajornanngilaq, taava ajornarsilluinnarpoq maannali pisilaarsinnaanngorpugut.

Naalakersuisut siulittaasuata Hans Enoksen - ip nunatta Canadamiit puisit amiinik pisisarnermi politikkia ima nassuiarpaa:

- Puisit amiinik pisiortunnginnissatsinnik aalajangerneq tunngaveqarpoq New Foundland-imi anaaleraluni puisinniarneq qangaaniilli kalaallit akerlerivaat, aammalu annertuumik sunniutai misigisaqarfiginikuuagut, taannalu tunngavigalugu Canadamiit puisit amiinik pisiortorneq unitsinneqarpoq, Hans Enoksen oqarpoq, nangillunilu:- Kisiannili ippassaq Nunavumi Naalakkersuisut oqaloqatiginerani natsiit amiinik pisisalernissarput isumaqatigiissutigineqarpoq.

Hans Enoksen oqarpoq Nunavormiut anaaleraluni puisinniarneq aamma akerlerisarigaat, aammalu uagutsituulli puisinniartarmata taakkunani puisit amiinik pisisarnissaq aqqutissiunneqalersoq.

-Aalajangernitsigut tunngaviuvoq aamma aporfeqarpallaangitsumik naggueqativut uagut suleqatigisinnaanissaat, tassami aamma uagutsitorluinnaq puisinniartarput, Hans Enoksen oqarpoq, oqarlunilu aamma puisit nunatsinnut tunineqartartussat nalunaaqutsersornerisigut Nunavuminngaaneersuuneri qulakkeerneqarsinnaasoq.

Hans Enoksen aamma oqarpoq Nunavumiit natsiit amiinik pisiortulerniissaq Great Greenland-imiit isumagineqassasoq.