Nunarput nunarsuarmi orniginarnerpaat qulit akornanniippoq

Takornariaqarnermi Inuussutissarsiornermilu Siunnersuisoqatigiinni pilersaarusiorlunilu ataqatigiissaarisoq, Anders La Cour, ima nassuiaavoq:

- Atuagassiamik Lonely Planetimik atuartartorpassuupput, atuagassiarlu tutsuviginarluinnartuummat, takornariartartunullu uppernarluinnartuummat taama toqqaanera uatsinnut tulluusimaarnaqaaq, Anders La Cour oqarpoq. Aperaarput Kalaallit Nunaat sooq toqqarneqarsimanersoq, akivorlu:

- Nunat ornitassat allamiorpasissut takornarnianit ujartorneqartuaannarput, allanit misilinneqarsimanngitsut misilikkusunneqartarlutuik, Kalaallit Nunaallu eqqaassagaani pinngortitaq kulturilu immikkuullarissorujussuupput, taamaammat takornarniat ornitassaqqigisarpaat, oqartariaqarpugulli takornariat suli amerlanerusinnaasut.

Anders La Cour aamma aperaarput, Lonely Planetip Kalaallit Nunaat takornarniarfigissallugu pilerinartorsuartut taakkartoraluaraa, takornariat ilumut takornariartassanersut qanoq ililluta qulakkeersinnaaneripput, akivorlu:

- Taanna apeqqutitsialaavoq. Tuniniaanissamik suliniutit pilerisaarutillu suliffitsinni ingerlattuassavavut, takornariallu Kalaallit Nunaannut tikikkaangamik ilimagisamittut misigisaqartarnissaat pingaaruteqarluinnarpoq. Tuniniaasartut nutaarsiassaqartitsiviillu, kiisalu angalanermik aaqqissuussisartut qanimut suleqatiginissaat pingaarteqaarput, tassa takornariat pisariaqartitaat kissaatigisaallu sapinngisamik anguniartarpavut, Anders La Cour oqarpoq.

- Tusagarput pillugu tulluusimaarlutalu nuannaaqaagut, Kalaallit Nunaammi nutaarsiassaqartitsivinnit tamanit maanna sammineqartorujussuuvoq, atuagassiallu Lonely Planetip Kalaallit nunaat takornariarfissatsialattut toqqarmagu uatsinnut tunissutisiaavoq angisooq, Anders La Cour naggasiivoq.