Nunarput nunarsuaq tamakkerlugu tassanngaannartumik ukkatarineqartoq

Amerikamiut præsidentiata Trumpip Nunarput pisiariniarlugu nalunaarutigereeraalu Nunarput tusagassiuutitigut qaqutigoortumik eqqartugaalerpoq.

Nittartakkatigut attaveqaqatigiittarfiit Twitterimi #greenland atorneqarnerpaat ilaanniilerpoq, nunarsuattalu ilarujussuani kangianit Thailandimit kitaanut USA-mut tusagassiorfiit Kalaallit Nunaannik ukkatarinnipput.

Ukkatarineqarnerput qanoq atorsinnaavarput? Takornariat tikerarnerulissappat aamma nunanit allanit aningaasaliisartut aningaasarpassuaatilerlutik tulleriaatilissappat?

Sebastian Zenkerip Copenhagen Business Schoolimi takornarialerinermik ussassaarinermillu ilisimatuup oqarnera naapertorlugu amerlasuut Nunatta piuneranik ilisimanninngitsut Kalaallit Nunaat maanna ilisimalerpaat.

AAMMA ATUARUK Trump sinnerlugu Nunarput pisiariniarsarivaa – itigartinneqarlunili

- Kalaallit Nunaat nunarsuup assiliartaani ilaalerpoq. Aamma takornariat eqqarsaataanniilerpoq, Sebastian Zenker oqarpoq.

- Trumpip Kalaallit Nunaat pillugu oqalunnera ukkatarinnitsitsingaatsiarpoq. Inuit Kalaallit Nunaat sermiinnaanngitsoq ilikkarpaat. Amerlasuullu sumiiffinnut nutaanut angalarusulerput. Angalaffissanut ikinngutimi orninnikuunngisaannagaannik misissuipput. Taamaalilluni Kalaallit Nunaat angalaffissaanniilerluni.

Aap, Kalaallit Nunaanni inoqarpoq

Visit Greenlandip nunarsuatsinni innuttaasut soqutiginningaatsiartut aamma malugaat.

- Nittartakkatsinnut, Facebookimi, Instragramimilu nalinginnaasumik alakkarterisoqarnerusoq takusinnaavarput, Visit Greenlandimi pisortaq, Julia Pars oqarpoq.

- Akeqanngitsumik oqallisigisaangaatsiarpugut, nunarsuatsinnilu inuppassuit Kalaallit Nunaata inoqarneranik ilisimanninngitsut nalunngilagut. Taakku Kalaallit Nunaat nunaasoq tikinneqarsinnaasoq maanna ilisimalerpaat.

Takoriartussanngorsinnaasut soqutiginnilerput – aamma inuussutissarsiornermi aningaasaliisartunik malugineqalerpoq.

Nunanut allanut tunngasunut Naalakkersuisoqarfiup aggustip 16-ianni tamanna misilippaa. Ulloq taanna Trumpip Kalaallit Nunaannik pisinissamut soqutiginninneranut siulliit tusarneqarput. Tamannalu nunanut allanut tunngasunut Naalakkersuisoqarfiup kingusinaarfiginagu atorluarpaa, tassami tweetimik ”We are open for business but not for sale-imik oqaasertalerlugu saqqummersitsipput.

Inuit 31,3 tusindit tweetimik nuannaripput – tusindillu affaannit ikinnerunngitsut allagaqarput.

Tweet iluatsilluartoq

Taamaakkaluartorli tweeti aningaasaliisinnaasunik soqutiginnittunik apeqquteqarfigineqarnermik kinguneqanngitsoq, naalakkersuisut siulittaasuata naalakkersuisoqarfiani pisortaq, Hans-Peder Barlach Christensen oqarpoq.

- Tweetip kingorna aningaasaleerusut amerlineranik malugisaqanngilagut, USA-mulli attaveqaatitsinnik siuariaateqarpugut, Hans-Peder Barlach Christensen oqarpoq.

Taanna tweetimik isummeqataasut ilagaat.

- Tuniniagaanata suleqatigilluarneqarsinnaanittalu malugitinnissaa pinerugaluarparput.

Tweetip soqutigineqarluarnera tupaallaatigaasiuk?

- Aap, taama oqartoqarsinnaavoq. Arlaannummi sanilliussinnaanngilarput. Taama pisoqarnikuunngilaq, aamma taamaattoqqissagunanngilaq, Hans-Peder Barlach Christensen oqarpoq.

Naak nunanit allanit aningaasaliisartut Trumpip pisinissamik nalunaaruteqarnerata kingorna amerlerujussuanngikkaluartut, præsidentip oqaaseqarnerata sunniutai nunarsuatsinnilu tusagassiutit ukkatarinninnerat sivisussapput.

Sebastian Zenker takornarialerinermi ussassaarinermilu ilisimatusartoq oqarpoq.

- Kalaallit Nunaata eqqartugaanera takussaatitsisuuvoq, Sebastian Zenker oqarpoq.

- Tuluit Nunaannik oqaruma, taava inuit London Brexitilu immaqa eqqarsaatigissavaat. Eqqaasitsisumik pilersitsisarput. Amerlasuut Kalaallit Nunaat sermerlu eqqaassanngikkaanni allamik eqqaasitsissuteqarpallaarunanngillat.

- Maannali inuit assinik quianartunik soorlu nunaqarfik Trumpip illuanik assiliartaqartoq nittartakkatigut attaveqaqatigiittarfikkut takuaat. Tamanna Kalaallit Nunaata sermiinnannginneranik oqaluttuarpoq.