Nunarput Norgelu suleqatigiinnerulerniarput
Naalakkersuisut siulittaasuat Kuupik aamma Naalakkersuisoq Ove Karl Berthelsen, pisortatigoortumik Norge-mut tikeraarnertik naammasseqqammerpaat. Tikeraarnerminnni Norge-mi ministeriuneq, nunanut allanut ministeri nunanut allanut komité, aammalu Norge-mi oqaluffeqarnermut allaffisornikkut nutaterinermullu ministeri ataatsimeeqatigineqarput.
Nukissiuuteqarneq avatangiisillu pillugit apeqqutit suligiissutigineqarnerisa nukittorsarneqarnissaat Norge-p Kalaallit Nunaata isumaqatigiissutigaat aammalu immami pisuussutit uumassusillit nakkutigineqarnerisa kiisalu nunap inoqqaavisa pisinnaatitaaffiiisa isumagineqarnissaat isumaqatigiissutigineqarput.
Nunat taakkua marluk ataatsimoortumik oqaaseqaateqarlutik nutaamik isumaqatigiissuteqarput.
Nunat inoqqaavisa paarilluarneqarnissaat naalakkersuisunit pingaartinneqarnerat Kuupik Kleistip erseqqissarpaa, taakkua inooriaasiat silap pissusaata allangorneratigut sunniuteqarmata, Kuupik Kleist Norge-mi samet radioanut oqarpoq.
Silap pissusaa pillugu isumaqatigiinniartoqarmat, nunat inoqqaavisa atugaat sammineqarpallaarsimanngitsut, Kuupik Kleist isumaqarpoq.
Silap pissusaa pillugu isumaqatiginniarnerni kingullerni nunani issittuni nunat inoqqaavisa atugaat eqqartorneqanngitsutut misigaarput, uagummi tassani pineqarpugut, Kuupik Kleist samet radioaanni apersorneqarluni taamatut oqarpoq.
Nunap inoqqaavisa avannarpasinnerusumi najugaqartut silap pissusaa pillugu isumaqatiginniarnerni eqqaaneqarnerunissaat, Norgemi ministerip Rigmor Aasrud-ip neriorsuutigaa, neriorsuinera pivoq Kuupik Kleist-imik ataatsimeeqateqarnerup kingorna. Rigmor Aasrup Norge-mi ilaageeqarnermut allaffissornikkut nutaaliornerminilu ministeriuvoq.
Avatangiisit pisuussutillu pillugit apeqqutini Kalaallit Nunaat Sametinge-imik suleqateqarnerminik siunissami nukittorsaaniartoq Naalakkersuisut siulittaasuat Kuupik Kleist neriorsuivoq.
Kalaallit pisortatigoortumik Norge-mi tikeraat Norge-miinnerminni norskit kunngiat Harald ilassivaat.
