Nunarput nittarsaalluarpaat

Takornariarfittut Kalaallit Nunaat 2013-imi anguniakkamini kusanarluinnartumik aallartippoq. Tamanna pivoq, angallanneq pillugu atuagassiaq, nunarsuaq tamakkerlugu nersugaasoq, Condé Nast Traveller, Kalaallit Nunaat pillugu pingaarnertut allaaserinnimmat, taamatuttaaq internetikkut saqqummiullugu.

Nunatsinni Takornariaqarnermut Siunnersuisoqatigiit, Visit Greenland naapertorlugu, atuagassiaq taanna aviisersuartut New York Timesitulli nuimatigaaq.

- Kalaallit Nunaata kusanassusersua takisoorsuarmik allaaserineqarpoq, asserpassuillu kusanaqisut ilanngunneqarsimallutik. Soorluluunniit New York Timesip saqqaaniiginnallarluta. Tamanna septembarip naalernerani pivoq, kisianni allarluinnaq aallaavigineqarluni. Kujataanimi illoqarfik Narsaq aviisimi allaaserineqarpoq, silallu pissusaata allanngoriartornera pissutigalugu Kalaallit Nunaata ineriartortinneqarsinnaanera qanoq periarfissaqarnersoq aamma allaaserineqarluni, Visit Greenlandimi, avammut paasissutissiisartoq, Malik Milfeldt, naammagisimaarinneqaluni oqarpoq.

Kalaallit Nunaannut, Qeqertarsuullu tunuanut ukiuunerani sulinngiffeqarluni angalaarsinnaaneq atuagassiami allaaserineqarpoq, aviisiliortullu, Tony Crossip, ilaatigut allaaserai, qimusserneq, arsarnerit, kalaallit ulluinnarni inooriaasiat, inuussutissarsiornerlu, kalaallit neriassaataat mamarluinnartut, soorlu qalerallit, tuttut- umimmaallu neqaat siatat, allarpassuillu.

- Amerikamiut atuagassiaanni kusanarnerusumik allaaserineqarsinnaanngilavut, Malik Milfeldt oqarpoq.

Condé Nast Travellerimi aviisiliortoq taanna Branding Greenlandimit Visit Greenlandimillu Kalaallit Nunaannut siorna marsimi tikeraarsarneqarpoq, taakku akiligaannik. Oqarsinnaavugullu aningaasat atorluarneqarsimasut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat