Nunarput nalliuttorsiutigineqarmat inuit 25.000-t ullumi najuussimassangatinneqarput

Kalaallit Tivolimi ulluni pingasuni aaqqissuussinerat ullumi naggataarnersiorneqarpoq.

Nunaqqatitta eqqumiitsuliornermik kulturimik nerisassioriaatsinillu neqeroorutigisinnaasai tivolimukaasorpassuit takuvaat, tusaavaat minnerunngitsumillu misilillugit.

- Ullumikkuinnaq inuit isaasimasut 25.000-it missaanniinneragaapput, alloriarnerillu tamangajaasa kalaallinik naapitaqartarpugut, Inooraq Olsen oqarpoq.

Siornatut ililluni ulluni pingasuni nalliuttorsiualaarneqarpoq, katerisimaarnerlu iluatsilluartoq, aaqqissuisoq Sidsel Møller oqarpoq. Inuit ilaat oqaatigaat taamatut aaqqissuussineq qimallugu, ulloq ataaseq taamaallaat nalliussisoqartaleqqissasoq. Tamanna kingusinnerusukkut nalilerneqartariaqartoq aamma isumaqartoqarpoq.

Kalaallinik katerisimaartitsineq ualikkut nalunaaqutaq marlunut ammarneqarpoq, aliikkusersuinerillu assigiinngitsut ingerlanneqarlutik.

Julie Berthelsen "Plænen"-imik taaneqartartumi tusarnaartitsivoq, inuit 8.000-it missaannik najuuffigineqartumi.

Erinarsoqatigiit Aavaat erinarsorput, kiisalu The Soul Mates-imik imminnut taasimasut tusarnaartitsillutik. Katsi Kleist, Lars-Emil Johansen aamma Pele Møller The Soul Mates-imi ilaasortanut ilaapput.

Eqqumiitsuliortoq Kristian Nuunu Rosing qiperukkaminik saqqummersitsivoq, ilaatigut nanorujussuaq meterinik marlunnik angissusilik uleerneqarluni.

Royal Greenland Academyp aaqqissugaannik, isiginnaartitsisarfimmi Pantomimeteaterimi aamma aliikkusersuisitsisoqarpoq.