Nunarput misissuinermi ilaasimasuuguni siuttuussagaluarpoq
Kalaallit Nunaat immikkut nalunaarusiamut ilanngunneqarsimasuuguni, inuttussuseq naapertorlugu persuttaanernik unnerluutiginnikulanerpaaffittut inississagaluarpoq.
Ukioq 2006-imi nunani assigiinngitsuni ikiaroornartunut allanullu atatillugu pinerlussimanerit pillugit nalunaarusiaq, siorna decembarimi saqqummersinneqarpoq. Tassani nunat 86-it tillinniarnerniit ikiaroornartunut atatillugu pinerlunnerit aqqusaarlugit, toqutsinernut tunngasut nalunaarutigisimavaat. Nunat qanoq inuttutiginerinut qanoq pinerluttoqakulatiginera sanillersuunneqarmata, Kalaallit Nunaat immikkut inissinneqarsimasuuguni inuttussuseq naapertorlugu persuttaaffiunertut amerlanerpaanillu toqutsiffiusartutut inissineqarsimassagaluarpoq. Radioaviisimi suleqatitta nunanit taakkunannga nalunaarutigineqarsimasut Nunatsinni naatsorsueqqissaartarfimmiit politiiniillu kisitsisinut sanilliukkamigit, Kalaallit Nunaat persuttaaffiunerpaasutut toqutsisoqakulanerpaaffiusullu sisamaattut inissippoq.
Naalagaaffiit Peqatigiit misissuititaasa erseqqissarpaat, nunarsuatsinni pinerlunnerit pillugit eqqoqqissaartumik takussutissaqanngitsut, nunarsuatsinnimi naalagaaffiit affaannaat immersugassanik immersuisimammata, naalagaaffiillu ilaanni qanoq pinerluttoqartigisarneranik pisortat ilisimasaat killeqartarmata, eqqoqqissaartumik nalunaarsuisoqarsinnaangitsoq.
Taamaakkaluartoq nalunaarsuinermi peqataasut agguaqatigiissillugit qanoq persuttaasoqartigisarneranniit, Kalaallit Nunaanni arfineq pingasoriaammik persuttaasoqartigisarnera, toqutsisarnerillu qiviaraanni pingasoriaammik amerlatigineri uissuummisitsipput. Nunatsinni peruttaanerit toqutsisarnerillu amerlassusaat nikeriarpiarneq ajortut politiit nalunaarutigaat.
