Nunarput Manerassuup qilanngaanit tikeraarneqarsimavoq

- Aatsaat qaangiutereermat eqqarsalerpunga takunninnerput upperiumaneqarnavianngitsoq. Uangami nammineerlunga uppererpiarsinnaannginnakku, Henrik Knudsen oqarpoq.

Taassuma timmiaq saneqquteqqaarmat assilinngitsoorpaa, qujanartumilli timmiaq 45 minutsit qaangiutiinnartut saneqquteqqippoq.

- Saneqquteqqimmat umiartortut akornanni nuannanneqaqaaq, qittataasartoqarluni suaartaattoqarlunilu, Henrik Knudsen nuannaaqaluni oqaluttuarpoq.

Qilanngaq aappillarissunik angisuunik siggoqarnini aamma niaqqumigut takisuunik meqqoqarnini pissutigalugit ilisariuminartuuvoq. Taanna Manerassuup avannarpasinnerusuani manniliortarpoq. Maannalu takuneqarfiatut avannarpasitsigisumi qaqutigorsuaannaq takuneqartarluni. Matumami siornagut avannarpasinnerpaami takuneqarami Sverigimi 1994-imi takuneqarpoq. Aamma timmissanik soqutigisalippassuit septembarimi Tuluit Nunaannut Kentiliaapput, tamaani qilanngamik takusaqartoqarsimanera tusarliunneqarmat.