Nunarput Kinami nittarsaakkaat
Ove Karl Berthelsenip suliffeqarfiillu nunatsinneersut Kinamut tikeraarneri iluatsillugit nunatta niuerutigisinnaasaasa nittarsaanniarnerisa saniatigut Kinamiut aningaasaliisartut Nunatsinnut soqutiginnilersinniarsavaat.
Kalaallit aallartitaasa Shanghai, Tianjin aamma Beijing tikeraassavaat. Tikeraallumi takornariaannaratik Kinamiut suliffeqarfissui soqutigisaqaqatigiillu nunatsinnut soqutiginnissinnaasut ataatsimeeqatigineqaqattaassapput.
Kalaallit aallartitaat Kinamut tikimmata Shanghaiimut nunneqqaarput, Ove Karl Berthelsenilu Kinami saviminilerinermik suliffeqarfissuisa annersaata ilaat Shanghai Zhenhua Heavy Industries Company-mit sinniisut ataatsimeeqatigalugit. Saviminilerinermik suliffeqarfissuup ilaatigut umiarsuarnut usigiaassuarnik sanaartortarnerisa saniatigut uuliasiorfiit, ikaartarfissuit kiisalu umiarsuit saviminertassaanik annertuunik sanaartorfiusartuuvoq.
Kalaallit aallartitaat Shanghai-imeereerpata illoqarfissuaq Tianjinimut tikeraassapput, tassanilu Ove Karl Berthelsenip Kinap aatsitassarsiornermut ministeria ataatsimeeqatigissallugu. Tamatuma kinguninngua taakku ingiaqatigiillutik nunat tamalaat aatsitassat pillugit saqqummersitsitsivissuani China Mining & Expo 2012-imut akuujartussapput.
Aatsitassat pillugit saqqummersitsitsinersuarmi nunatsinni suliffeqarfiit, soorlu Air Greenland, Royal Arctic Line, Greenland Mining Services, London Mining, MT Højgaard Grønland, Avannaa Resources aamma Tanbreez Greenland peqataatitaqassapput.
Asulu saqqummersitsitsinersuup ingerlanneqarnerani Nunarput immikkut sammineqarniartoq. Tassani aatsitassarsiornermut suliaqartartunut aatsitassanillu ujaasinermik suliaqartartunut aningaasaliiumasunik pissarsiortoqarnissaa siunertaavoq.
Tianjinimi aatsitassarsiorneq pillugu nunat tamalaat saqqummersitsivissuani kalaallit akuunerisa saniatigut Nunatta Kinallu akornanni niuerneqatigiinneq nukittorsarniarlugu Ove Karl Berthelsen qaaqqusisuliullugu, qallunaallu aallartitaqarfiata aaqqissuussaanik katersuuttoqassaaq, ilaatigullu Kinap takornariaqarnermut ministeria peqataasuussalluni.
Aaqqissuussinermi tassani Beijingimi pisussami Nunatta takornariangassaqqinera nittarsaanneqassaaq, tamatumalu saniatigut siku, imeq, ammillu nunatsinneersunik pisisartussarsiortoqassalluni. Aaqqissuussinermi tassani ilaatigut Visit Greenland, Air Greenland, Great Greenland aamma Igasa Food Festival nunatta kujataaneersoq peqataatitaqassapput. Tassani Kinamiut suliffeqarfissuisa sinniisaat Kinamiullu tusagassiisarfiisa ilanngutassiortui arlallit immikkut qaaqquneqarput.
Tamatuma saniatigut Kinami sanaartornermik suliffeqarfissuit annersaata ilaat, China Communications Construction Company-meersut Ove Karl Berthelsenip sapaatip akunnerata tulliani ataatsimeeqatigissavai, tassanilu Nuup Kangerluani Isukasiani saviminissamik piiaaffissap sanaartorneqarnissaanut atatillugu aqquserniortussatut ilumut piukkoornersut paasiniarneqassalluni.
Ove Karl Berthelsenip aamma naapissavai Kinami aningaaserivissuit annersaanni, China Development Bankip pisortaa. Tassani oqaloqatigiissutigineqassalluni London Miningip puilersaarutaasa naammassiartorneranut atatillugu, aningaaseriviup aningaasanik milliard-ilikkaanik aningaasaliinissaa, aviisi Politiken allappoq.
