Nunarput japanimiumit isigalugu
Japani pillugu ilisimatooq, Aki Tonami, Nunat avannarliit Kangia pillugu ilisimatusarfianni NIAS-imeersoq tamatumunnga suna pissutaanersoq aammalu Japanip soqutiginnilersinnissaanut Nunatsinnit qanoq iliorsinnaanersugut aperaarput.
- Japanimiut suliffeqarfiisa Kalaallit Nunaanni periarfissat maannamut suli takusimanngilaat. Aatsitassanummi uuliamullu tunngatillugu Japanimiut suliffeqarfii Kangiani qiterlermi Amerikamilu kujallermi niuerfinnut aningaasaliisimapput, Aki Tonami taama oqarpoq.
Taanna aamma isumaqarpoq Japani taamaaliornermigut aatsitassanik pisariaqartitani qulakkeereersimagai.
Taanna Kalaallit Nunaat Kangialu pillugit isumasioqatigiinnermi Ilisimatusarfimmi ingerlanneqartumi aammalu ilisimatusarfiup NIAS-illu suleqatigiilernerisa kingorna aaqqiissuussinerit siullersaanni peqataavoq.
Isumasioqatigiissitsinerup siunertaraa Kangiata Kalaallit Nunaanni sammineqarnerulernissaa soqutiginnittullu Kangia pillugu ilisimasaqarnerulernissaannut periarfissinnissaat, Kalaallit Nunaatami siunissaa Kangia apeqqutaasupilussuummat. Nunanimi taakkunani aatsitassarsiorfissuarnut uuliasiornermillu suliniuteqarnissamut aningaasaleerusuttoqarluni aningaasassaqartinneqarpoq, aamma takornariat nunanit taakkunaneersut periarfissaqarluarput.
Maannakkutulli isikkoqartillugu Kina Korea Kujallerlu soqutiginnittutuaasimapput.
- Kalaallit Nunaannik soqutiginninnerminnik takutitsinissaminnut Kinamut Korea Kujallermullu unammillernissaminnut maannamut pisariaqartitsisimanngillat, Aki Tonami taama oqarpoq.
Japani pillugu ilisimatooq, ilaatigut Japanip Issittumi periusissaanik misissuisugaqartup, Japanip aatsitassatigut pisariaqartitaminik qulakkeerinnereersimanera oqaatigineqareersutut tikkuarpaa. Taamaakkaluartoq Kalaallit Nunaata Japanip nunamut aningaasaliisinniarnissaanut periarfissaqarluarsoraa. Japanimiummi, Koreamiunut ussersuataarlutik tikittartunut naleqqiullugit, malugitinnaveersaarlutik piareersaateqaqqaartarput.
Aammattaaq oqaatigaa Japanimi atorfilittat Japaniumiullu suliffeqarfii mianersortupilussuusartut, taamaammallu aningaasaliissagaangamik nalorninartoqannginnersoq aatsaat qulakkeeqqaarlugu aalajangiisartut.
- Anguniagaqarniarlutilli aalajangeraangamik sukkasuupilussuarmik suliniuteqalersarput, aamma Japanimiut suliffeqarfiinut Kalaallit Nunaannullu pissarsiaqaataalluarsinnaanissaa ilimanarluinnarpoq. Korea Kujallermulli Kinamullu naleqqiussissagaanni, inuiaat kalaallit utaqqisinnaassuseqarnerusariaqassapput.
Aki Tonamip takornariat Japanimeersut Kalaallit Nunaannit iluanaarutaalluarsinnaanerat aamma tikkuarpaa. Arsarnerilli aputeqarneralu kisiisa pilerisaarutigineqassanngillat, tamakkumi Islandimi takuneqarsinnaareerput.
- Kalaallit Nunaata inuiaat japanimiut soqutiginnilersillugit nittarsaassisoqarsinnaappat iluaqutaassagaluarpoq. Oqaluttuassamik nassaaraanniliuna.
Tonami taama oqarpoq, namminerlu aamma Nuparput pillugu pilerisaariumaarluni aamma oqaatigalugu.
- Nuna kusarnartorsuaq, aatsaat nunamik taama ittumik tikitaqarpunga, taamaammat puigulertornavianngilara, Aki Tonami taama oqarpoq, aasamullu tikeqqissinnaassalluni aamma neriuutigalugu.
