Nunarput Islandimik suleqateqarnissamut piareersarpoq

Islandimi peqqinnissamut oqartussat pitsassuarmik ingerlatsipput, taamaattumik Nunarput Islandimut suleqatigiinnissamik isumaqatigiissuteqarnissaminut piareerpoq, Peqqissutsimut naalakkersuisoqarfimmi pisortaq Ann Birkekær Kjeldsen, ulluni sisamani Islandimut paasisassarsiorluni angalaqqammersoq oqarpoq.

Taamatut nutaamik isumaqatigiissuteqarnerup kinguneranik napparsimasut nukinginnartumik suliaritittariaqartut ukiumut 70-it Islandiliartinneqarsinnaalissapput.

- Islandimi peqqinnissamik isumaginninneq pitsaalluinnartuusoq maluginiarparput. Soorlu pitsaassutsimut tunngassuteqartunik takussutissiortarput nunanilu allani ingerlatsinernut assersuusiortarlutik, taamalu suleqatikkuminarluinnartuullutik, Peqqissutsimut naalakkersuisoqarfimmi pisortaq Ann Birkekær Kjeldsen taama oqarpoq.

Taassuma aamma oqaatigaa, paasisassarsiorlutik angalaqatigiit Islandimi peqqinnissamik isumaginninneq iluarinartilluinnarmassuk, Nunatta Islandillu suleqatigiinnissamut isumaqatigiissutaat nutarterneqassasoq, taamaalilluni napparsimasut nukinginnartumik suliarineqartariaqartut ukiumut 70-it missaat aappaagumiit Islandiliarsinnaalerniassammata. Taamaattorli oqalutseqarnermut aamma napparsimasut inissaannut tunngasut suli iluamik inissinngitsut oqaatigalugu.

- Paasinarsivoq oqalutsit arlallit Nunatsinneersut, Islandimi Peqqinnissamik isumaginnittunut attuumassuteqartut. Taakku pikkorilluinnartuupput, napparsimasunullu attaveqaataanissaminnut paasinnilluarsimallutik. Tassami Islandimi aamma nunap ilaaneersunik ilaquttaminnit ilagineqartunik katsorsartittoqartarpoq. Tamakkuninngalu najugaqartitsisarneq misilittagaqarfigineqarmat tamanna ernumanartippallaarunnaarparput. Maanimi atuutereersut aallaavigalugit suleriaqqissinnaassagatta, Ann Birkekær Kjeldsen oqarpoq.

Napparsimasunik Islandimut Islandimiillu angallassineq ajornartorsiutaalersinnaavoq, tamannami silamit ajornakusoortinneqalersinnaammat. Oqartussammi qanoq iliussappat napparsimasoq nukinginnartumik suliarisariaqartoq soorlu Kulusummiit ingerlariaqqissinnaajunnaarpat?

- Tamanna eqqumaffigilluinnaqqissaartariaqarpoq. Islandimiut Nunatsinnut timmisartuussisarnerup annertusarneqarnissaannik soqutiginnipput. Aamma Nunatsinniit nukinginnartumik timmisartukkut Islandiliaassisariaqaraangatta, soorlu immaqa timmisartup taassuma uternerani napparsimasunik suliaritereersimasunik ilaasoqartissinnaasassavarput, Ann Birkekær Kjeldsen naggasiivoq.

Napparsimasut nukinginnartumik suliarisariaqartut Danmarkiliartinnagit Islandiliartittalernerisigut ukiumut ikinnerpaamik 10 millionit koruuninik sipaartoqarsinnaasoq, peqqissutsimut naalakkersuisoqarfimmi pisortap Ann Birkekær Kjeldsenip oqaatigaa. Islandimut suleqatigiinnissamik isumaqatigiissut kingusinnerpaamik 2010-mi marsip aallaqqaataani atsiorneqassaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat