Nunarput Islandilu suleqatigiinnerulissapput

Aningaasaqarnermut Nunanullu Allanut Naalakkersuisup, Aleqa Hammondip, Islandimi nunanut allanut ministeri, Ingibjörg Sólrún Gisladottir, nunatsinnut 2008-p aallartinnerani tikeraarsarpaa.
Allattoq Elisa Isaksen
novembarip 16-at 2007 17:14

- Issittumi silap pissusaata allanngoriartornerata soqutigineqaleriartornerata kingunerisaanik Islandimiunik oqaloqateqartarnissaq, isummanillu avitseqateqartarnissaq iluaqutigissavarput, Aleqa Hammond oqarpoq.

- Naalagaaffeqatigiinnerup iluani namminersuleriartortilluta nuna sanilerisarput kangiatungitsiniittoq suleqatiginerusariaqarparput, nunanik kitaatungitsinniittunik soorlu aamma attaveqalereersugut. Islandimiunit ilikkagassaqaqaagut, nunanullu allanut politikkimut tunngatillugu Islandimiunik oqaloqateqarnerusarnissarput pissusissamisuuginnarpoq, Nunanut Allanut Naalakkersuisoq oqarpoq.

Nunat Avannarliit kiisalu Nunat Avannarliit Killiit suleqatigiiffigisartagaasa saniatigut Kalaallit Nunaat Islandilu nunanut allanut politikkikkut tunngasutigut aaqqissuussaasumik suleqatigiilissallutik aatsaavissuaq sulissuteqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq