Nunarput isiginerlunneqalerpoq
Nunatsinni qimmit qimuttut aasaanerani naalliutsinneqartarnerat maanna avatitsinni oqallisigineqaqaaq. Tamannalu nunatta isigineqarneranut innarliisinnaavoq.
”Inuit qimmiminnut pinnittarnermik assinganik aamma taama pineqartariaqaraluarput. Inuit qanoq iliortarnerat takujagaluttuinnartillugu qimmera nuannarileraluttuinnarpara”.
Taama Norgemi aviisimut Verdens Gangimut atuartartut ilaat allassimavoq. Aviisimi tassani allaaserineqarsimavoq, Kalaallit Nunaanni uumasut nakorsaasa qimmeqarfiusunut angalanerminni qimmit qimuttut 62-t missaanniittut perlilertinneqarlutik uumatinneqartut toquttariaqarsimagaat.
Norskit aviisianni ilaatigut allaaserineqarsimavoq, qimmit niui nallorsimasut igiinnapajunneqarsimariarlutik atugarliortillugit ilaginnarneqartarsimasut, taamalu kigutaat kaattamik peerneqartarsimasut pituutartik kimmarlugu kipinnginniassammassuk.
Taamatuttaaq Norgemi atuartartut ilaat kamaammersimaqaat allaat oqartarlutik kalaallit qimmit pineqarnerattulli ilillugit pineqartariaqaraluartut.
Tamannalu nunatta takornarianut nittarsaannissaanut nittarsaatitsialaagunanngeqaaq.
Tassami Norgep aviisia taama tusarliussereersorlu, Norgemi uumasunik illersuiniaqatigiiffiup NOAH-p qimmit naalliutsinneqarsimasut assingi takoreerlugit Danmarkip aallartitaqarfianut akerliunermik ersersitsiniarlutik iliuuseqarnialerput.
- Siunertariniarparput danskit oqartussaasuisa tamanna pinngitsoornagu iliuuseqarfigissagaat, Norgemi uumasunik illersuiniaqatigiit NOAH-p siulittaasua Siri Martinsen Norgep aviisianut taama oqarpoq.
Kalaallittaaq naalakkersuisuinit tamanna qisuariarfigineqarpoq.
Inuussutissarsiornermut naalakkersuisoq Siverth K. Heilmann tusagassiutinut nalunaarummik ima ilaatigut allappoq:
- Qimuttut nunatta kulturikkut kingornussassaasa pingaarnerit ilagaat.
Taamaammat erseqqissaatigissallugu pingaaruteqarpoq, danskit aviisianni allaaserineqarsimasut Uumasunik illersuineq pillugu inatsit aamma Qimminik qimuttuuteqarneq pillugu inatsit tunngavigalugit unioqqutitsinerummata, naalakkersuisunut ilaasortaq Siverth K. Heilmann taama allappoq.
Qimuttut paarinerlunneqartut pillugit Naalakkersuisut ilisimatinneqassasut erseqqisaatigineqarpoq, kingornalu qanoq iliuuseqartoqarnissaa Naalakkersuisut aalajangiiffigissagaat, tusagassiutinut nalunaarummi allassimavoq.
