Nunarput inuttusiartorpoq
Kalaallit amerlanerulersimapput. Tassa innuttaasut amerlassusaannik nunatsinni Naatsorsueqqissaartarfiup naatsorsugai kingulliit naapertorlugit nunatta inui siornamut naleqqiullugit 115-inik ilasimapput. Kisitsisit aamma takutippaat ukioq manna januaarip aallaqqaataani 57.000-nngornissatsinnut inunnik 31-iinnarnik amigaateqartugut.
Nunatta inui tamaasa isigissagaanni 26 procentit Nuup kommuneani ullumikkut najugarput.
Nunatsinni inuttusiartorneq nunanit allaniit nunatsinnut nussornernik peqquteqarani kinguaassiornermik peqquteqarpoq.
Nunatsinnut nuuttartut ukioq manna 72-inik ikileriaateqarsimapput. Nunanit allanit nunatsinnut nunasisut ukioq manna 6686-iupput, taakkunannga 5801-it qallunaajullutik.
Naatsorsueqqissaartarfiup naatsorsuinera naapertorlugu ukioq 2014-imi nunatsinnni 58.000-nngorsimassaagut, taamanikkussamullu nunasisut 600-inik ikileriarnissaat eqqoriarneqarpoq.