Nunarput eqqakkanit takujuminaallisinneqartoq

Visit Greenlandip misissuinerata, Greenland Mapping Projectip tamanna takussuserpaa. Tamanna takornariaqarnermut kingunerlussinnaasoq peqatigiiffik isumaqarpoq.

Kanunupemi siulittaasup kommunit inuttaasullu akisussaaffimmit tigusigunik aaqqiisoqarsinnaasoraa.

Nunatsinni pinngortitami kusanaqisumi plastikkit, biilikut manngertornisut, sanaartornermit eqqagassat uningaannartut takornariat nunatsinnut tikeraartarneranut kingunerlussinnaapput.

Visit Greenlandip, misissuinerani Greenland Mapping Projectimi takornariat 400-it apersorneqarput amerlasuullu kingunerlussinnaanerarpaat.

Eqqaavissuarnit ammaannartunit eqqagassat maanngaannartut, nunaqarfinni, illoqarfinni pinngortitamilu eqqagassat assingi Kanunupemi siulittaasup, Jens Kristian Therkelsenip ilisarisinnaavai.

- Ataatsimut isigalugu nunaqarfeqarpoq eqqiluittorujussuarnik aammalu nunaqarfeqarluni eqqakkanik takunniffiusinnaasunik.

Visit Greenland pisortarigallagaa, Lykke Geisler Yakaboylu naapertorlugu unammillernartoq tamanna iliuuseqarfiusariaqarpoq.

- Piffissaq qaninnerusoq eqqarsaatigalugu sunniuteqarsimasinnaanissaa ilimaginngilara. Piffissarli ungasinnerusoq eqqarsaatigalugu qularinngilara kingunerlusinnaasoq

Visit Greenlandip Kanunupelli illoqarfinni nunaqarfinnilu ukiumoortumik saliisarnissamut ulloqartarneq erseqqissarpaat.

Kommunilli eqqagassanik isumaginnittariaasaasa pitsaanerunissaat innuttaasullu akornanni pissutsinik allannguinissaq tamatumani pisariaqarpoq.

-  Kommunit eqqagassanik akisussaasuupput. Aamma innuttaasut nunaqarfimmi eqqiluitsitsinikkut akisussaaqataanermik takutitsisariaqarput.

Jens Kristian Therkelsen oqarpoq, nunalu tamakkerlugu suleqatigiittoqarnissaa ujartorpaa.

Visit Greenlandilu taamatupaaq aamma pilersaaruteqarpoq.

- Torersunngortitsinissamut kusassaanissamullu kommunit illoqarfinnilu ingerlatsisut suleqatiginiarpagut.