Nunarput Danmarkilu isumaqatigiissusiornissamut piareerput
Nunat aamma naalakkersuisut siuttui Bella Centerimut ullumikkut takkutillattaalerput. Ataatsimeersuarnermi malinnaasoq Else Løvstrøm ima paasissutissiivoq.
- Ullumikkut ulloq neriuutissartaqarpianngitsutut aallartikkaluarpoq. Danmarkip ministeriunerata ataatsimeersuarnermik aqutsineq Connie Hedegaardimut tunniuppaa.
Taassuma suleqatigiissitat arlallit piumaffigai, apeqqutinut 102-nut tunngasunut aaqqiissutissanik aqagumut nassaarniaqqullugit. Taakkulu naalagaaffiit siuttuisa aqagu isumaqatigiinniutigisussaassavaat.
- Ullumikkut naalagaaffiit siuttui assigiinngitsut oqalugiarput. Soorlu Frankrigip præsidentiata Nicholas Zarkozyp ataatsimeersuartut anguniagaqanngippallaarnerarlugit avoqqaarai. Siunnersuutigalugulu naalagaaffiit siuttui unnummut aaqqiissutissamik nasaarniaqatigiissasut.
- Taamaattorli Nunarput Danmarkilu isumaqatigiissuteqarput. Maannakkut isumaqatigiissutit marluk naammassineqareerput. Nunallu tamalaat isumaqatigiissutaat qanoq ittoq akuersissutigineqarnersoq apeqqutaatillugu, sorleq atuutilissanersoq aqagu paasinarsiumaarpoq.
