Nunarput CO2-mut tunngasumik suli isumaqatigiissuteqanngilaq

Silap allanngoriartornera pakkersimaarniarlugu Danmarkimi isumaqatigiissuteqarnissami Nunatta peqataasinnaanera suli nalorninartoqarpoq. Isumaqatigiinniarnerit pitsaasumik ineriartortutut Kuupik Kleistip oqaatigai. Kisianni nunat tamalaat Københanvnimi isumaqatigiinniarnerat naammassitinnagu, Nunatta piumasaqaatai, silap pisusaanut tunngasunut danskit ministeriata Connie Hedegaardip atsioqataaffigisinnaanngilai.
Allattoq Jens Thorin
novembarip 10-at 2009 12:46

Silap allanngoriartornera pakkersimaarniarlugu iliuusissanut Nunatta Danmarkillu isumaqatigiinniarnerat suli naammassinngisut sulili ingerlasut, Naalakkersuisut siulittaasuata oqaatigaa.

Tassalu Nunatta CO2-mik annerusumik aniatitsisinnaanissaanik Nunarput Danmarkilu isumaqatigiissuteqarsimanngillat, taamaattoq Kuupik Kleist isumalluarpoq.

- Nunatsinni ineriartortitsinissamut piumasaqaativut akuersarneqarnerulerput. Aamma Nunat tamalaat akornanni isumaqatigiissut naammassineqarpat, Nunatta soqutigisai ilaatinneqarsinnaassasut ilimanarpoq, Kuupik Kleist oqarpoq.

Tassami CO2-mik annerusumik aniatitsisinnaanissamik taamalillunilu suliffissuaqarnikkut ineriartorsinnanerup inissaqartinnissaanik Nunarput kisimi kissaateqanngilaq. Nuna allat aamma taama kissaateqarmata, nunat tamalaat akornanni isumaqatigiinniarnerni taama inerniliisoqariartortoq, Kuupik Kleist oqarpoq.

- Nunat naalagaaffiillu amerlanerpaat soqutigisamittut saqqummiussugaat soqutigsatsinnut qanittuaraapput, taamaalillutalu naatsorsuutigaarput, Københavnimi naalakkersuinikkut isumaqatigiissutaajumaartoq, Nunatta soqutigasaanut tulluunnerussasoq, ukiup affaa matuma siorna takorloorneqartumiit, Naalakkersuisut siulittaasuat oqarpoq.

Tassalu silap pissusaa pillugu nunat tamalaat decembarimi isumaqatigiissuteqareerpata aatsaat, Nunatta piumasaqaatai naammassillugit isumaqatigiinniutigineqarsinnaqalissasut, Kuupik Kleist, nassuiaavoq.

- Isumaqatigiinniarnerit marloqiusaapput, Nunatta Danmarkillu akornanni, taavalu nunat tamalaat akornanni isumaqatigiinniarnerit, qularutiginngilluinnarparalu, soqutigisavut annertunerpaatigut naammasineqassasut, Kuupik Kleist oqarpoq.