Nunarput Canadalu raajalerngutiliinnariaapput

Canadami talittarfiit, kalaallit savalimmiormiullu raajarniutaannut matuneqassasut Aalisarnermut ministerip Gail Sheap aalajangersimagaa, Canadami Aalisarnermik pisortaqarfik tusagassiutinut nalunaarpoq.
februaarip 05-at 2010 15:59

Pisassiissutigisat sivisuumik qallunaanit canadamiunillu isumaqatigiinniassutaasimagaluarput. Atlantikup Avannaata Kitaani Aalisarneq Pillugu Suleqatigiiffimmit Nafomiit pisassiissutigineqartut, raajarniartunik akuerineqanngippara ministerip siorasaarutigaa raajarniat Canadami talittarfinnut tulannissaat akuersaarneqarnavianngitsoq.

Decembari 2004-miit marsi 2008 ilanngullugu matussineqareerpoq, Canadami Aaalisarnermut ministeri oqarpoq. Talittarfinnillu 2008-mi ammaassisoqaqqinneranut pissutaavoq isumaqartoqarmat isumaqatigiinniarnerit iluatsissasut. Kisiannili taamatut pisoqanngilaq.

- Kalaallit savalimmiullu aalisapilunnerat akuerineqarsinnaanngilluinnarpoq, minister Shea oqarpoq.

NAFO-mi ilaasortaasut allat, canadamiut isumaqatigaat oqarlutik, kalaallit savalimmiullu raajartarisartagaat amerlavallaartut, ilisimatusarnermullu isummersuutinut naleqqutinngilluinnartut.

Raajartassat 3101 tonsiuginninnarnissaat Danmarkip suli aalajangiusimavaa. Kisitsit canadap nunallu allat NAFO-mut ilaasortaasut pisassiissutissat annertussusissaattut siunnersuutigisaannit quleriaammik anneruvoq.

Februaarip 15-ni isumaqatigiinniarnerni isumaqatigiittoqassanngippat talittarfiit kalaallinut savalimmiormiunullu matuneqassasut, minister Sheap erseqqissaatigaa, Canadami ilanngutassiortutta Marianne Stenbæk taama ilisimatitsivoq.

Danmarkimi naalakkersuisut aalisarneq pillugu aaqqiagiinnginnermut akuliukkumanngillat, tamannalu savalimmiormiunut kalaallinullu isumagitinniarlugu. Umiarsualiviit Canadamiittut siornatigut - 2004-mi decembarimiit 2008-mi marsimut - kalaallit Savalimmiormiullu raajarniutaannut matoqqatinneqareerput.

Amalie Jessen, Aalisarnermut Naalakkersuisoqarfimmi pisortaq, Danmarkimi aviisit ilaannut Politikenimut oqarpoq, savalimmiormiut raajarniat Nunatta eqqaani raajartarisartakkaminnit amerlanerusunik Canadap imartaani pisaqartartut.

- Imartami pineqartumi massakkut kalaallit raajarniutaat ataaseq kisimi raajarniarpoq, taakkulu raajartaminnik Canadamut tulaassisinnaanngillat, taamaattorli umiarsualivinnik matusisarnikkut aaqqiagiinngissut qaangerneqarnavianngilaq, Amalie Jessen ilaatigut taama erseqqissaavoq.

Canadamiut aalisartui Nunatta sineriaanut qanittumi aalisarput, Nunatsinnilu umiarsualivinnut pisaminnik tulaassisarlutik, canadamiullu Nunatsinni umiarsualivinnut tulaassisarnerisa mattunneqarnissaannik pilersaaruteqartoqanngilaq.

Amalie Jessen oqarpoq, umiarsualivinnik mattussineq, ingammik Savalimmiormiut aalisariutaannik mattussineq, illoqarfeeqqanut Canadap sineriaaniittunut sakkortunerpaamik eqquissasoq, tassami talissinnaanermut akileraarutinik pisarunnaassammata, aamma orsussamik taquassanillu tunisaqarsinnaajunnaassammata.