Nunarput Canadalu imminnut ungasilliartuinnarput

Kalaallit Nunaat Canadalu imminnut ungasilliartuinnarput. Tamanna kingullermik naqissuserneqarpoq puisit amii pillugit oqallittoqarmat. Taama oqarpoq danskit Iqalunni konsuliat Kenn Harper. Taanna isumaqarpoq ajornartorsiut aallaaveqartoq nunatta Canadallu akornanni timmisartukkut aqquteqannginneranik.

-Canadap Kalaallit Nunaatalu akornanni timmisartukkut aqquteqarallarmat, niueqatigiinneq pitsanngoriartuinnarsimagaluarpoq. Inuit suliffeqarfiillu akornanni attaveqatigiilluartoqarluni. Timmisartorsinnaanerli ukiut tallimat matuma siornatigut unitsinneqarmat tamakku tamarmik kipitinneqarput, Kenn Harper Nunatsiaq News-imut apersorneqarnermini oqarpoq.

Kenn Harper aamma isumaqarpoq nunat taakku marluk akornanni ungasilliartortoqartoq siuttui aatsaat nalliuttorsiornerni imaluunniit ajornartorsiortoqartillugu naapittarmata.

-Attaveqarneq pitsaanerusimagaluarpat puisit amii pillugit oqallinneq pinngitsoortinneqarsimasinnaagaluarpoq, Kenn Harper oqarpoq.

Iqalunniit Nuummut timmisartorneq akunnernik marlunnik sivisussuseqarpoq, Montreal-imiilli Boston-imiilluunniit Københavniliarniaraanni ullut pingasut tungaannut sivisussuseqarsinnaalluni.