Nunarput Californiami ussassaarutigineqassaaq
Prins Joachim siuttoralugu, nunanut allanut pisortaqarfik nunatsinnilu suliffeqarfiutillit USA-mut angalalerput. Niueqatigiinneq siuarsarniarlugu naapeqatigiinnissaq juunip qaammataani pissaaq, tassanilu nunanut allanut ministeriaqarfik suleqatigineqassalluni.
Danmarkip niuernermut siunnersuisartussaa Californiamiittussaq ammaanersiorneqassaaq, aammalu danskit USA-mi oqaluffeqalersimanerata 100-liinera malunnartinniarneqassalluni, taama Kalaallit Nunaanni Sulisitsisut Peqatigiiffiata nittartagaanni allaaserinnittoqarpoq.
Kalaallit savalimmiormiut danskillu niuerutigisartagaat siuarsarniarlugit, kunngikkormiunik, oqaluffimmik inuussuutissarsiuteqarnermullu tunngasunik ataatsimoorfiusumik suleqatigiittoqalerpoq.
Danskit USA-mi aallartitaqarfiat aammalu Amerikamiut Washington-imi niuernermut suliniaqatigiiffiat suleqatigineqassapput.
Nunanut allanut pisortaqarfik nalunaarpoq, ukioq kingulleq kulturi niueqatigiinnerlu pillugu USA-mi aaqqissuussisimanermut maaannakkut aaqqissuussinissaq nangitsinerusoq. Aaqqissussinissap siunertaraa, Kalaallit Nunaata USA-mik niueqateqalersinnaaneranut periarfissarsiornissaq.
