Nunarput brintiliornissamut suleqataajumavoq

Nunat Atlantikup avannaaniittut Islandip Savalimmiut, Nunavut Norgellu ikummatissaq brinti pillugu suliniutaannut Nunatsinni Nukissiorfiit, suliffeqarfiillu assigiinngitsut suleqataassapput.

Ikummatissamik brintiliorsinnaanissaq siunertaralugu nunani suleqatigiissuni atortutitigut inissisimaneq misissorneqassaaq.

Nuummi innaallagissap aqqutaasa Kangerluarsunnguanilu innaallagissiorfiup pilersuineranit innaallagissap sipporuttup brintiliornermut atorneqarsinnaanera mannamiit misissorneqarpoq.

- Suliaq ukiuni marlunni suliarineqassaaq, Nuummilu sumiiffeqarfiit arlallit brintiliorfinngorsinnaanerat aamma misissorneqassaaq, Nukissiorfinni ineriartortitsinermut siunnersorti Peter Kjeldmann oqarpoq.

Brintimik suliniut Atlantikup Avannaani Brint pillugu peqatigiiffimmi NAHA-mi aallartinneqartoq, Atlantikup avannaani aningaasaateqarfimmiit NORA-miit 300.000 kruuninik aamma tapiiffigineqareerpoq.

Unnummi kulturisiorfimmi januaarip 27-ianni pisussami, ikummatissamik brintiliuutit Nuummi Nukissiorfeqarfimmi takusassiarineqassapput.