Nunarput BBC-mi aallakaatitassiarineqalerpoq

Nunarsuarmi tv-qarfiit annerpaat ilaat Tuluit nutaarsiassaqartitsiviat BBC nunatsinnut tikeraartitaqarpoq, takornariartitsisarnerput pillugu aallakaatitassiortussanik.

BBC-meersut Kangerlussuarmi umimmannik takornariartinneqarput, sermersuatsinnullu aamma tummartinneqarsimallutik. Massakkorpiaq Ilulissaniipput, Qeqertarsuullu Tunuani sumunnarfissanut assigiinngitsunukassapput, soorlu Qasigiannguani avannaata qimussersuaqarnissaa malinnaaffigiartussavaat, sisoraassapput, qimussertinneqarlutik, Ilulissallu sermeqarfiat soorunami aamma takornariassallugu.

- Kalaallit Nunaata avammut alutornartutut takusassiarinissaa siunertaavoq, nunalumi angisoorsuaq nipaatsorlu alianaaq. Cliff Jones BBC-meersut aallakaatitassioriartortut sisamaasut ilaat oqarpoq. Cliff Jones siullerpaamik Nunatsinniissimavoq siorna aggustimi, taamanerniillu Nunatta tv-kkut aallakaatitassiarinissaa pileritsaassimallugu.

- Kalaallit Nunaata nunarsuarmi qeqertani annersaanera eqqarsaatigineq ajorparput, aallakaatitassiarpulli aqqutigalugu tuluit oqaluttuukkusuppavut, Kalaallit Nunaanni feriassagunik misigisassarpassuaqartut asseqanngitsunik, Cliff Jones oqarpoq.

BBC-p 2 millioninit ikinnerunngitsunit isiginnaartoqartarlunilu tusarnaartoqartartup, Nunarput pillugu radiukkut aallakaatitassiaa Tuluit Nunaanni apriilip arfineq aappaanni aallakaatinneqassaaq, tv-kkullu aallakaatitassiaa akunnerup affaani sivisussuseqartussaq kingusinnerusukkut aallakaatinneqartussaasoq aallakaatitassiortut ilisimatitsipput.