Naalakkersuisoq Nunarput Bangladeshimut assersuunneqarsinnaanngilaq
Nunarput nunarsuarmi nunani pisuujunerpaat akornanniinngikkaluarluni atugassarititaasut piitsuunerpaat ilaannit Bangladeshimit ajunnginnerungaatsiarput, Naalakkersuisut Laura Tàunâjimmut Siumumeersumut akissuteqarlutik taama inerniliipput.
Meeqqat pisinnaatitaaffii pillugit Naalagaaffiit Peqatigiit isumaqatigiissutaat Bangladeshimi atulersinneqarnera qanoq ingerlanersoq Laura Tàunâjiip apeqqutigaa.
Naalagaaffiit Peqatigiit Meeqqat pisinnaatitaaffiinut isumaqatigiissutaata Nunatsinni atulersinneqarnissaa milliardit affaannik akeqarnissaa nalunaarummi inerniliunneqareersoq Laura Tàunâjik taama apeqquteqarpoq.
Taamaammat nunat Norgesulli pisuujunerusut aningaasalersuineranniit nunat piitsuunerpaat isumaqatigiissummut qanoq aningaasalersuisarnerata misissorneqarnissaa naleqqunnerunnginnersoq, Laura Tàunâjik isumaqarpoq.
Taamali eqqarsarneq Sara Olsvigip isumaqatiginngilaa. Nunarpullu Bangladeshilu assigiinngitsorujussuusut erseqqissaatigaa.
Nunatsinni 2015-imi isertitat agguaqatigiissillugit, inuk ataaseq 312.000 koruuninik isertitaqarpoq, Bangladeshimilu 7.000 koruuniluunniit pallinngilaa.
Tassalu nunatsinnut sanilliullugu Bangladeship meeqqat pisinnaatitaaffii pillugit inatsisinik atuutilersitsinnginneranut peqqutaasoq, soorlu Inatsisartut taamaalioreersut, Isumaginninnermut naalakkersuisup Sara Olsvigip, Laura Tàunâjiip apeqquteqaataanut akissuteqarnermini ilaatigut oqaatigaa.