Nunarput avammut nittarsaanneqarnerulerniarpoq

Nunatta takornariaqartitsivia Greenland Tourism ullumi ataatsimeersuarpoq, siunissamullu qiviarluni suliniutissat nutaat aallartisarniarneqalerput.

Pilersaarutit ilaat tassaapput takornariaqartitsinerup iluani nutaaliornerit ammaassiffigineqarnissaat, taakkullu siuarsarniarlugit siunnersuisoqalernissaq: - Nutaaliornianut suliffeqarfinnillu mikisunnguugaluartunik aallartitsinianut pitsaanerusumik siunnersuineq aqqutissiuunniarneqarpoq, Inuussutissarsiornermut naalakkersuisoq Johan Lund Olsen oqarpoq.

Naalakkersuisut tungaaninngaanniit paasisitsiniaasoqarluni sineriammut angalasoqaleruttorpoq. Angalanermi takornariaqartitsinerup aaqqissuusseqqiffigineqarnera saqqummiunneqaqattaarpoq. Naalakkersuisut taamaaliornermikkut naatsorsuutigaat periarfissat taakku atorluarneqarnerisigut nunatsinni inuutissarsiorneq nukittunerusoq pilersinneqarnissaa.

Greenland Tourismimi siulersuisuni siulittaasoq, Flemming Nicolaisen, saqqummiussinermini oqarpoq nunatta avammut nittarsaanneqarnera annertusarniarneqalersoq, nittarsaassinermilu nunat qitiusut tassaassasut nunat Europamiittut, Japanilu: - Tysklandi nunarujussuuvoq, piareersimavugullu tyskit amerlanerusut tikilluaqqussallugit, aamma immikkut taasariallit tassaapput Japan aamma Frankrig, Flemming Nicolaisen oqarpoq, nangillunilu: - Aamma Danmarkip avannaaniittut nunat soorlu Sverigikkut allallu taasariaapput. Nunat taakku pissanganartumik takutitsipput, periarfissanillu ulikkaarlutik, Greenland Tourismimi siulittaasoq tunngavilersorpoq.