Nunarput ATC-p nunarsuarmut nittarsaalluarpaa

Arctic Team Challengep tunumi juulip qaammataani ukiut tamaasa ingerlanneqartartup tv-kkut nunanit tamalaaneersunit maluginiarneqarnerulerneq anguaa.

Nunani tamalaani tv-qarfiit 242-t ukioq manna unammineq pillugu filmiliaq takutissimaleraat, aaqqissueqataasut ilaat Anders Steenbakken oqarpoq.

Tv-qarfiit Australiamit Kinamut, Europamit USA-mut kiisalu Amerika-Kujallermut filmi 26 minutsinik sivisussuseqartoq takutissimalerpaat. Filmimi tassani holdit sisamat tunumi pinngortitarsuarmi 250 kilometerinik ingerlaarnerat qaqqanillu 9.000 meterinik qaqinerat takutinneqarpoq.

Aaqqissuisut nunat tamalaat soqutiginninnerulernissaat anguniarlugu tuluttut oqaasertalimmik tv-kkut ukioq manna aallakaatitassiortitsisimapput, tv-qarfiillu maannamut 242-t anguneqarsimalermata tamanna iluatsilluarsimasutut nalilerneqarpoq.

Arpatsitsinissat arfinilissaat aappaagu juulimi ingerlanneqassaaq, nunaannakkullu arpannermik nuannarisalinnit nuannarineqaqaaq. Nunarsuarmi unammisitsinerit taama ittut pitsaanerpaat qulit ilaattut Arctic Team Challenge marloriarlugu nalilerneqarsimavoq.