Nunarput arfeqassutsimik kisitsillaqqinnerusariaqarpoq
IWC-mi ataatsimeersuariaqataasuni ataatsimiisitaliat ilaat ataatsimiimmat, ilisimatuussutsikkut ataatsimiisitaliap saqqummiinerani ersersinniarneqarpoq, Kalaallit Nunaat arfeqassutsimik kisitsisitsisarnera pitsaanerulersinneqartariaqartoq. Tikaagulliit kisinneqarsimaneranni kisitsisit pitsaavallanngillat, taamaammallu tikaagullittassanik IWC-mit ikilisaasoqarniarsinnaanera ilimanarsisinnaasoq, Aalisarnermut pisortaqarfimmi pisortaq, Amalie Jessen oqarpoq.
-Inissisimanerput ajuuippoq. 2003-mi 2004-milu tikaagulliit marluinnaaviit misisuinernit, takuneqarsimapput, taannalu pisimavoq timmisartoq atorlugu kisitsinikkut. IWC ilisimatusarnikkut ataatsimiisitaliaata kisitsisit taakkua ajoraluartumik atorsinnaanngitsutut nalilerpaat, tassa arfatassiinissamut atorneqarsinnaanngillat erseqqarinnerusunik tutsuiginartunillu kisitsisinik perusupput.
Tikaagulliusaat pillugit paasissutissat pitsaanerulaarput, tikaagullinnillu pisassiissutissatut siunnersuutigineqarpoq sisamaniit qulit tungaanut pisarineqassasut, Aalisarnermut piniarnermullu pisortaqarfimmi pisortaq Amalie Jessen oqarpoq nangillunilu;- Tikaagulliit eqqarsaatigalugit iluamik inassutinik soqanngilaq, inassutigineqarporli misissuinerit maanakkumiit pitsaanerusut ingerlanneqassasut, aammalu misissuinissani aningaasaliisoqassasoq. Ikilisitsinissaq aamma annertuumik inassutigineqarpoq. Illuatungaatigut aamma pisoqarsinnaavoq, inatsisinik qilersuisusssanik aalajangiisoqarpat kalaallit nunaat maannakkumiit ajornerujussuarmik inissisimalissaaq. Amalie Jessen aamma oqarpoq iliuusissanik periarfissat pingasuusut, tassaasut, tikaagullinnik pisassanik IWC-p ikilisitsisinnaanera, imaluunniit, Kalaallit Nunaat nammineerluni pisassanik ikilisitsinera, pingajuattullu periarfissaavoq, Kalaallit Nunaanni tikaagullittassanik ikilisitsinngiivilluni tikaagullinniartitsineq. Periarfissanut taakkunannga aalajangiinissamut naalakkersusut aalajangiiumaartut Amalie Jessen oqarpoq.
Taama oqarpoq, Aalisarnermut pisortaqarfimmi pisortaq, Amalie Jessen.
Kalaallit Nunaani arfernik kisitsisarnerit IWC-mit uparuarneqarmata, Pinngortitaleriffimmi arfernik kisitsisarnerni akisussaasoq, Michael Kingsley, oqarpoq uparuaasoqarnera pakatsissutigalugu. Michael Kingsley isumaqarpoq ukiuni kingullerni arlaqalersuni kisitsisarnerit ajunngitsumik ingerlanneqartartut, pinngortitaleriffillu IWC-mit arfernik kisitsisoqarnissaanik aappaagumut peqqussummik tunineqarsimapput.
