Nunarput Arctic Winter Gameseqarnerani maannamut 13-inik ujaminnareerpoq

Kuultit tallimat, sølvit sisamat bronzellu sisamat, unammiuaarnerit ulluni sisamani ingerlanneqareersut pissarsiarineqarsimalerput.
Allattoq mlk, Simon Uldum
marsip 20-at 2014 09:05

Snowboardertartoq Mathias Mark, snowboardimi sangusaarnermi ataasinngormat kuultinnappoq, ippassarlu Rail Jamimik unammisoqarnerani kuultinnaqqippoq slopestylemillu unammisoqarnerani sølvinnalluni. Ullumilu Arctic Airimik unammisoqarnerani ujaminnattani pingatseriaannaavai.

Snowboardertartoq 16-inik ukioqartoq ippassaq unamminnginnerani KNR-imit oqaloqatigaarput, slopestylemilu unammeqataanissani isumalluarfigivallaanngikkaluarpaa, snowboardimik unammissutigineqartartumi tassani peqataasunut piumasaqaatit sakkortummata.

- Sisorarfissaq paatsiveerunnarpoq, pissinnissamut sukkatsisarfissaqarpiannginnami periarnissaq ajornakusoortuuvoq. Maanga tikikkatta sisorarfissap suliarineqarnera pitsaavallaanngitsoq takugatsigu pakatsissutigilaarparput. Sapinngisamilli nuannisarniarsaraagut sisorarfissarlu taamatsillugu atuinnartariaqarlutigu, KNR-ip ilanngutassiortuanut taama oqarpoq.

Mathias Mark aamma fairplayimik ippassaani immikkut akissarsisinneqarpoq.

- Annuffiunngilaq. Nuannisarnissarmi, unammeqatigisat pilluaqqunissaat nuannisaqatiginiissaallu pingaarneruvoq.

Unammiaqataa Jonas Strømsted aamma ingerlalluarpoq - taannami slopestylemi rail jamimilu marlunnik bronzinnappoq.

Alla pingasunik ujaminnassimalluni angerlarsinnaasoq tassaavoq Tonny Fisker Nuumminngaanneersoq. Taanna Inuit Gamesimi takutitsillualaavissorpoq, one hand reachimi kuultinnalluni, Alaskan High Kick søvinnalluni triple jumpimilu bronzinnalluni.

Indianerit pinnguaataanni Dene Gamesini kalaallit aamma angusarissaarput. Inuusuttut inersimasullu Hand Gamesini kuultinnapput. Inuusuttuni unammeqataasut tassaapput Kristiannguaq Lange, Karl Kristian Mathiassen, Aabilinnguaq Sandgreen aamma Aqqalu Sørensen, inersimasunilu  Aputsiaq Fleischer Høy, Jens Jørgen Lange, Gert Møller aamma Minik Platou unammeqataallutik.

Sisoraaserluni sangusaarnerit ullumi ingerlanneqassapput. Kalaallit ujaminnalluartussatut neriuuteqarfigisaat inuusuttunnguaq Mette Bourup, ippassaq sangusaapiloortoqarnerani orluvoq, ullumili kuultinnannissani neriuutigivaa.

- Ullumikkut piumassuseqarluartupilussuuvoq, sungiusaasua Navarana Lennert taama oqarpoq. Aammattaaq oqaatigaa kinaluunniit orlusinnaasartoq.

- Aput manngerami peqataasullu pissangarrallutik. Kinaluunniit orlusoorsinnaavoq - World Cupiugaluarpat GM-iugaluarpalluunniit, sungiusaasua taama oqarpoq.