Nunarput angalaffissatut piukkunneqartoq
Taamatut nersorniaaneq "New Frontiers"-imik taaguuteqartinneqarpoq Kalaallit Nunaatalu pinngortitaata kulturiatalu immikkuullarissuunerat kiisalu Kalaallit Nunaanni angalasutut misigisassarpassuit pissutigalugit tunniunneqarluni.
Nersorniaaneq nunatsinni takornariartitsineq pillugu siunnersuisooqatigiinnit Visit Greenlandimit nuannaarutigineqarpoq.
- Kalaallit Nunaata 'Pioneering Nation'-itut nittarsaannissaanik suliniarnerput aallartikkatsiguli Kalaallit Nunaata ukiuni hundrelinni, ilami ukuni tuusintilinni paasisassarsiortunit tikinneqartarsimanera sulilu taamatut inissisimanera nunarsuarmiunut oqaluttuariniarsarisimavarput, pisortaq Anders Stenbakken oqarpoq nangillunilu:
- Nittarsaassinermik sulinerup takornarialerisullu kiffartuussinerisa neqeroorutillu pissutigalugit USA-mi tusagsssiuutit ataqqisaasut ilaannit isiginiarneqalerpugut, Anders Stenbakken naammagisimaarinnillu oqarpoq.
Outside Magazine ukiut 35 sinnerlugit ingerlasimavoq, pingaartumillu USA-mi Canadamilu tunisaalluni.