Nunaqqativut filmini piviusuunngitsuni pingaarnertut inuttaapput
- Assilissat Katuap igalaarsuanut ikkussuuneqarneranni, angut inuusuttoq aperivoq ilumut assilissat takusani filmitut takutinneqassanersut, Julie Edel Hardenberg oqaluttuarpoq.
Angut taanna aperisoq takusani piviusuunasoralugit tupigutsassimasoq, Julie Edel Hardenberg oqaluttuarpoq.
Eqquiitsuliortup suliai Katuami tallimanngornermi ualikkut saqqummersinneqarnerat ammarnersiorneqarpoq. Taakkualu assiliarsuit 16-it kalaallinik inuttaqarput kalaallisullu allassimallutik. Tassa Julie Edel Hardenbergi filmigassanik takoqqusaarusiorpoq.
Assiliarsuarni takoqqusaarutigineqartut filmeliarineqarnikuunngillat, pisuusaartitsinerullutilli. Kisianni piviusunngorsinnaagaluartut Julie Edel Hardenberg isumaqarpoq.
- Kalaallit oqaluttuassanik soqutiginartorpassuarnik ulikkaarput, oqaluttuallaqqinnersaallutillu. Taakkualu tigusuugutsigit pilersitsinnaagaluarpugut, Julie Edel Hardenberg oqarpoq.
Filmip assiliartaa taaguuteqarpoq " 21.06.2019" nunasiaataasimasut inuiisa kinguaavi ilimmaqqittut namminersulivinnerannik oqaluttuaq. Assilissami takuneqarsinnaapput ilinniarnertuut pingasut atuakkat akornanni Ilimmarfimmi atuakkanik tigumiartut.
- Namminersulivinnermut ingerlaarpugut, qaqugu tamanna pissava? Tamanna pereerpat namminersulivinnerput aamma oqaluttuarineqartussaavoq, imaluunniit filmiliarineqarluni, tamannalu takorluulereerpara. Ilinniarnertuut akornanni isummat tamakkua pilersinneqartaramik, Julie Edel Hardberg oqarpoq.
Assilissat assiliisartumit Lars Frederik Andersenimit assilisaapput, Iben Mondrupilu saqqummersitsinermut aaqqissuisuuulluni.
Saqqummersitsineq "Sapiitsut" novembarip ulluisa 13-iata tungaanut Katuami takuniarneqarneqarsinnaavoq.
