Nunaqqaterput Alaskami alutorsarpoq

Inuit Issitormiut ataatsimeersuariarnerannut Alaskami pisumut kalaallit nunatsinneersut peqataasitaasa Utqiagvikmut tikinnertik assigiinngitsutigut misigisaqarfigisimavaat. Utqiagvik 5000 it missaanni inoqartoq nunatsinni illoqarfiup Uummannap nalaaniippoq, illoqarfiilli taakku marluk issittumiikkaluarlutik assigiissuteqanngivipput. Bente Hegelund Paarisami suleqataasoq ataatsimeersuarnermut peqataavoq. Utqiagvikmi pissutsinik alutorsarpoq aammali tupigusulluni.

-Maluginiarsimasama ilagaat illoqarfiup ilusaata alutornarnera. Taavalu inuit: Meeqqat inuusuttuaqqat inersimasullu pualanerusussui, aamma unnukkut nereqatigiinnermi misissornianngikkaluarni, takuneqarsinnaavoq, peqqinnartunik nerinngitsut.

-Sanilerisagut burgeritorput naatitartaqanngivissunik, neqitaa annertoorujussuarmik ketchup/dressingilerujussuarlugu.

- Akinnut ingittut arnaq angullu pualasoorujussuit chipsinik sodavandinillu puallarnarsinnaasunik neripput, taakku angissusaannut naleqqiullunga uanga misigisimalerlunga mikisuaranngorlunga.

-Illoqarfimmi angalaarnitsinni aamma malugisatta ilagaat illoqarfiup ilusaa, soorlu nunatsinni 60-ikkunni. Qullersuit napparussuit qisuit. Aamma illut ullutsinnut naleqquppallaanngitsutut taaneqarsinnaasut alutornartorujussuit.

-Inuit inussiarnersorujussuupput, saneqqullutik aalaterisut uninngagutta uniffigaluta ilassiortarpaatigut, oqaloqatigaluta suminngaanneernerput apersuutigalugu.

-Assorsuaq naapikkuminarput, ittoornanngitsut aamma qiimasut, assorsuaq nuannerpoq isigalugit, Bente Hegelund ICC-p Utqiagvikmi ataatsimeersurnerani nunatsinnit peqataasoq oqarpoq.