Nunaqavissut piginnaasaat pitsanngorsarneqartuarput

 Taamaalilluni taakku sulinissaminnut periarfissaat pitsanngorsarneqassapput, qallunaat allalluunniit avataaneersut immaqa sulisorineqartussaagaluartut.

Inuussutissarsiornermut Aatsitassaqarnermullu Naalakkersuisoq, Ove Karl Berthelsen, parteeqammi, Juliane Henningsenip, Inuit Ataqatigiinneersup, paragraf 37 tunngavigalugu apeqqutaanut akissummini taama allappoq. Juliane Henningsen avataaniit sulisartunik siunissamut ungasinnerusumut periusissat eqqarsaatigalugit arlalinnik apeqquteqarpoq.

Ove Karl Berthelsen akissummini allappoq, pingaartumik aatsitassat eqqarsaatigalugit nunaqavissut pikkorissartuarnissaat Naalakkersuisut anguniartuaraat.

Tassani ilaatigut innersuussutigaa, uuliasiortitseqatigiiffiup Cairn Energyp uuliasiorluni qillerinissaa pillugu Namminersorlutik Oqartussat kommunillu siorna siullermeerlutik isumaqatigiissuteqarnerat.

Nuna Oilip namminersortutut piorsarneqarnissaanut Cairn Energy 276 millionit koruunit missaannik taamanikkut akiliisariaqarsimavoq. Nunaqavissullu piginnaassaannik qaffassaanermut suliffeqarfik 28 millionit koruuninik aamma aningaasaliisariaqarsimalluni. Nunat allamiut sulisartuinut akileraarutinut ikinnerpaamik 53 millionit koruuninik aamma akiliisariaqarsimavoq, kalaallit suliffeqarfiinit nioqqutissanik pilersuinerit 150 millionit koruunit missaannut naatsorsorneqarallarlutik.

Ove Karl Berthelsenip aamma ilisimatitsissutigaa, Danmarkimi Nunanik Allamiunik Sullissivimmut sulilernissamut najugaqarnissamullu akuersissummik qinnuteqaqqaartariaqassasut..

Tamanna attuumassuteqartunut tamanut periusissaq sivisusinnaassaaq. Pilersaarutini annertuuni piffissaq sammisanik suliarinninneq sivikinnerpaajutinniarlugu periusissaq maanna suliarineqarsimavoq, taamaaalilluni sulisitsisoq sulisussani nnanit allaneersut tamaasa ataatsikkut suliaritissinnaassallugit, amerlasuunnorlugit ataatsimoortumik qinnuteqarnertut iluseqartillugu.