Nunaqarfnni tuniassassiorfiit piginneqatigiinnikkut ingerlanneqartariaqarput
Nunaqarfiillumi ilaanni piginneqatigiinnikkut ingerlalluartoqarsinnaasoq uppernarsaatissaqarpoq. Ilulissat nunaqarfiisa ilaanni Qeqertani, Qeqertaq Fish ApS-mi aqqanilinik sulisulimmi ulluni makkunani ingerlalluartoqarpoq. Allaffimmiuat Marna Møller ima unnersiorpoq:
- Maani ingerlalluarpugut, qalerallit ullormut 4 tonsit sinnerlugit tunisassiarineqartarput, Marna Møller naammagisimaarineqaluni, radioaviisimut oqarpoq.
Nunaqarfiit ilaanni tunisassiorfiit matoratarsinnaanerat KANUNUPE-p siulittaasuanit Jens Kristian Therkelsen-imit Ikerasanneersumit aarleqqutigineqarpoq.
- Assersuutigalugu SIK, KNAPK ataatsimoortillugit suleqatigisinnaagutsigik, isumaqarpunga nunaqarfinni tunisassiorfiit ingerlateqqinneqarsinnaasut.
Jens Kristian Therkelsen aamma isumaqarpoq, nunaqarfinni tunisassiorfiit nunaqarfimmiunit namminersortutut ingerlanneqarsinnaasut:
- Isumaqarluinnarpunga ingerlassinnaagaat, tunitsivinnik ingerlatsinermut ilisimaarinnittunit paasissutissanik pissarsisinnaagunik, soorlu arlalinnit piginneqatigiinnikkut ApS-it qanoq ingerlanneqartarnerinut tunngasunik, KANUNUPE-p siulittaasua Jens Kristian Therkelsen, radioaviisimut oqarpoq.