Nunaqarfinnut taarsigassarsititsisalernissaq periarfissaalluarsorineqarpoq

Nunaqarfinni inuussutissarsiutit siuarsarniarlugit aningaasanik amerlanngikkaluanik atukkiisalernissaq, Kommuneqarfik Sermersuumi borgmesterip anguniartariaqarsoraa. Taama oqarnera, nunaqarfiit siunissaat pillugu Københavnimi Kalaallit Illuutaanni ippassaq ataatsimiisitsinermi saqqummerpoq.
Allattoq Najaaraq Egede
oktobarip 30-at 2009 10:40

Taarsigassarsitsisarneq mikrolånimik taasagaq nunani ineriartortitassani inuussutissarsiutinik siuarsaanermi atugaasorujussuanngoreerpoq.

Asii Chemnitz Narupip taarsigassarsisitsisarneq nunaqarfinni najugalinnut periarfissanngortariaqariaqarsoraa.

- Tassa ilisimaneqarpoq nunani ineriartortuni Bangladeshimi inunngorsimasup Yunusip taarsigassarsisitsisarneq nutaaq ukiut 20-t matuma siornagulli pilersissimagaa, aallartippoq.

Piitsoqarfinni inunnut nammineq inuussutissarsiornissamut aqqutissiuussisimavoq.

Muhammed Yunus Nobelimit, 2006-imi nersornaaserneqarpoq, ukiuni 30-ni kingullerni pingaartumik Bangladeshimi arnanut 20 koruuniniit qummut atukkiisarsimanini pillugu. Amerlanerit 500 koruunit nalingannik taasigassarsisarput ikittunnguakkaarlugit taarsersortakkaminnik.

Yunusip inuussutissarsiornermut siuarsaariaasia nunanut 40-nut siaruarsimalereerpoq.

- Aamma inuit pikkorissarneqartarsimapput - aamma kulturikkut inooriaatsikkullu ajornartorsiutit pillugit qaammarsaaqatigiittarsimallutik, Asii Chemnitz Narup nassuiaavoq.

Inuit taarsigassarsisinneqartut nutaaliornissamut naleqarnerusumillu inuulernissamut aamma neriorsoqatigiittarsimapput.

- Periarfissat taamaattut iluatinnarput nunatsinnilu aqqutissiuuttariaqarlutik.

Borgmester Asii Chemnitz Narup aamma oqarpoq, pingaartumik Kommuneqarfik Sermersuumi Tunumi Kitaanilu innuttaasut assigiinngitsorpassuarnik aallaaveqarmata atorluaanissaq pisariaqalersoq.

- Pissuussutinik uumassusilinnik, soorlu Tunup qeqquaanik umimmaanik allanillu atuilluni inuussutissarsiutinik siuarsaanissaq periarfissiuunneqartariaqarpoq, oqarpoq.

- Kommuneqarfik Sermersuumi allattoqarfik siunnerfiliinissamut - periarfissat itisilerlugit misissussallugit aallarnisaavoq. Taarsigassarsisitsisalernissaq nammineq kommuneqarfittut aqqutissiuutissaneripput, aningaaseriviilluunniit suleqatigissanerivut imaluunniit naalakkersuisut peqataassanersut paasinarsissaaq, Asii Chemnitz Narup oqarpoq.

Det Grønlandske Selskabip aaqqissugaanik nunaqarfiit pillugit oqallitsitsinermut inuit 120-t peqataapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq