Nunaqarfinnut pilersuinissaq aallartissaaq

Nunaqarfinnik pilersuinermik KNI-Pilersuisup ingerlatsilernissaa Naalakkersuinikkut siorna alajangerneqarpoq, taama alajangermut atatillugu piumasaqaatigineqarpoq allanngortiterinermi innuttaasut sullinneqarnerat ajornerulissanngitsoq akerlianilli ajornanngippat pitsaanerulissasoq, akikinnerulissasoq, eqaannerulerluni ataqatigiissaarinerlu pitsaanerulissasoq. KNI Pilersuisoq ingerlatsinissamut piareersimalluinnartoq KNI-p pisortaanera Gerhardt Petersen oqarpoq.

- Royal Arctic Bygdeservicemi angallatit massakkut atorneqartut tamaasa ingerlatilissavagut, taakkulu nutaanik tallimanik aamma ilaneqassapput. Aappaagu upernarneraniit kitaani Attumiit Kullorsuaq ilanngullugu nunaqarfiit angallassiffigineqassapput.

Uummannap kommuneani qaatsiartaat januaarimiit qaammatit pingasut ingerlareerpata atulissaaq, tamanna sioqqullugu KNI Air Greenlandimut isumaqatigiissuteqarsimavoq qulimiguulik atorlugu assartuussigallarnissamik.

Qaatsiartaatip ukiortaamiit ingerlaannartumik atulissannginneranut peqqaavoq talittarfissap Uummannamiittup qaatsiartaammut naleqqutinnginnera. Gerhardt Petersen oqarpoq Qaarsuni taliffeqalernissaa sulissutigineqartoq.